ZALEN June 27, 2025 : Vawiin khan MSU hruaitute chuan RIPANS Director Dr. Sanjay D.Sawant chu a Pisa-ah hmuin RIPANS-a Students Seat Reservation leh Other Backward Classes (OBC) te pual hnaruak chungchang an sawipui. 

MSU hruaitute chuan Director hnenah hian RIPANS-a State dangin Seat Reservation pali (4) an neih chu an hnawhkhah loh chuan Mizoram atanga dil Zirlaite tan dahsak thin turin an ngen a. M.Sc zirna bikah hmun dang Institution-ten an kalpui angin RIPANS Alumni te tana 30% Seat Reserve turin an ngen bawk.

Hnalak chungchangah OBC Post chauhin dil theih chu tihkhawtlai ang deuha hriat thin chu pawi an tih thu an sawi a. OBC te chauhin an dil theih ang chi chu a ranglama hna dilna notification tichhuak zung zung turin an ngen nghal a ni. 

RIPANS Director chuan Seat Reservation hnawh khah loh a awm chuan an theih ang anga Mizo te tana an kalpui tur thu-in a lo chhang a. OBC Post hnalak tur awm pawh notification tihchhuah vat anih tur thu-in a lo chhang a ni. 

MSU hruaitute chuan Director in tha taka a lo dawnsawnnaah lawmthu an sawi a. Mizoram Zirna In a thil thleng hrang hrang te chu MSU in an vilzui reng thu an hrilh bakah, Director anih chhunga Mizote hamthatna tura theihtawp chhuah zel turin an beisei bawk tih an hrilh a ni.