Aizawl: Rural Development Minister Lalruat-kima chuan nimin khan MLA Local Area Development fund atanga lei puanthui khawl leh in chung khuhna rangva a sem.

Hemi puala inkhawmtawi Dinthar Br. YMA hall-a neih hi AMC ward No. 12 councillor R.Thanglura chuan a kaihruai a, bialtu MLA Lalruatkima chuan MLA fund atanga khawl sem chu tangkai taka hmang tur leh mi dangte tana malsawmna ni turin a chah. Minister chuan veng chhung hmasawnna tura hmachhawpte tar langin veng chhung inkalpawhna kawng pawh veng hrang hrangah siam that hna thawh mek a nih thu sawiin Temple to Vaivakawn, Dinthar to New Capital Complex kawng resurfacing tih tura ruahman fel a nih tawh thu a sawi bawk.

Minister chuan, “Ni 100 inhlawhna central sawrkarin min pek thin chu tihpun niin tunah hian ni 57 bawrvel theuh inhlawhna hi siam tawh niin central atangin cheng vaibelchhe 300 chuang kan dawng tawh a. Tun hmaa ni 100 inhlawhnaa ni 26 bawrvel chauh inhlawh thin kha sawrkar tharah chuan a danglam tawh a ni,”a ti bawk. MLA Local area development scheme 2019-2020 atanga lei puanthui khawl hi mi 95 hnenah sem niin in chung khuhna rangva mi 18 hnenah Minister hian a hlan a ni.