Aizawl February 1, 2024 : Vawiin khan Road Safety Month 2024 hawnna hun neih a ni a. Road Safety Month 2024 hman tur hi kumin atana a tum hnihna tur niin a tum khatna chu January 2023 khan neih a lo ni tawh a. February 12 atanga 17 inkar hian No Tolorence Drive neih tum a ni.

Kum 2021 hma lam kha chuan Road Safety Week anga hman thin niiin Mizoram pumpuia hman tura ruahman a ni. Road Safety Month 2024 thupui atan 'I himna atan Traffic Rules te zawm ang che' (Obey Traffic Rules for your own safety) tih a ni a. Tun tuma Road Safety Month 2024 hi February 1-29, 2024 chhunga hman tur a ni.

He hunah hian Transport Dept. Director Er. R. Lalrammawia'n thusawina hun a nei a. Lawmna thuchah sawitu Er. R. Lalrammawia chuan India ram chu Road Safety scenarion ah kan dinhmun a chhe hle a ni a ti a. Road Accident-ah 100-ah 11 chu India rama thleng anih avangin India sorkar lu ti haitu a ni, a ti a. Road Accident avanga sum an chan hi maktaduai tel fel a nih thu leh kan ram economy a eichhe nasa hle a, chuvanga kan economy nghawng nasa anih avangin sorkar laipuiin hma a la nasa em em a ni a ti. Road Accident chu a thawktu traffic leh Transport Dept chauh hmalakna tur ni lovin mipuite chu an pawimawh vek a ni a ti a. Sorkar laipuiin thuchhuah a siam angin State tin khawpuiah Road Safety Council din a nih thu a sawi bawk.

Transport Dept Minister Vanlalhlana'n Road Safety Month 2024 hawnna leh thusawina hun an nei a. Minister chuan Road Safety Month hlawhtlin theihna tur atan chuan lirtheih khalthiamte thlawp a ngaih thu a sawi a. Mizoramah lirthei chesual zat chu kum 2021 chhungin 69 awmin kum 2022-ah 133 ah a pung thu a sawi a. Dan zawmlo te chu Motor Vehicle Act 1988 hmanga hrem theih an nih thu leh Motor Vehicle Act 2018 hnuaiah phei chuan na taka hrem theih an nih thu sawiin lirthei chetsual avanga nunna chan an awm thin chu pawi a tih thu leh Motor Vehicle Act leh Rules te chu zawm tha tlat turin mipuite chu a ngen bawk a ni.

Aizawl-ah pawh Road Safety Council thukhawmin chuan No Tolerance Drive chu tun thla February 12-17 chhung ngeia neih tum a ni a. Road Safety Week 2024 chhung hian Road Safety awareness neih tum a ni a, hemi chhung hian school NCC te chu traffice police duty post ah duty tir ve thin ni sela tih rel a ni a. NGO leh school hrang hrang ah awareness kalpui tura ruahman a ni a. AIR Aizawl leh DDK Aizawl-ah live discussion neih tura ruahman a ni a. Road Safety Month-in a tum chu englai pawhin lirthei khalhtute chu fimkhur tir a ni.