Aizawl : Nimin zing khan bye-election neih na 4-Tuirial bial chhungah Robert Romawia Royte chu hmuh a ni a, he thil thlengah hian Congress lam chuan Minister hian dan a bawhchhe ngei a, hrem ngei an duh laiin MNF lam chuan Hortoki khuaah hian a chawl lo a, dan bawhchhiatna a nei lo, an ti ve thung. Hortoki MPF lam chuan motor an tih din tirh khan Robert Romawia hi hmu sela chuan an khua an kaltlang tir loh thu an sawi ve thung.

Hortoki MPF Secretary leh Hortoki Vengchhak YMA President Lalhruaia hnen atanga ZALEN thudawn dan chuan Hortoki MPF hian zing dar nga vela report an dawn bawhzuiin motor an lo chang a, anni hian lo chang chhuakin, motor hma seat tukverh te pawh an hawn tir a, feh tura insawi an nih avang in an chhuah ta mi niin an sawi. Mahse, an ngaih a that theih ngang loh avangin an umzui ta leh a, Sipai kai-ah an zuk nang ching leh a, mahse, hetah pawh hian Robert Romawia hi an la hmu lo a, an kalna tur kawng an hriat loh avangin kawng nuam zawk an kawhhmuh a, Kaipui an tih mai an panpui laiin an thlangah Robert Romawia hi an hmu ta niin a sawi. A tira an tih dinna hmasa berah khan hmu nghal se chu an khua hi an kaltlang tir a rin loh thu MPF Secretary hian a sawi. Motor-ah hian designation plate engmah intar a awm loh thu a sawi tel bawk.

Congress thuchhuah chuan, Tuirial bial bye election neihna tur chhungah hian Campaign tawp ni October 27, 2021 zan dar 6 atangin inthlanna zawh hma chu bial pawn lam mi, candidate leh an agent te bak awm phal loh a ni, order pawh tihchhuah niin, mipui hriat turin tha taka puanzar a ni bawk, an ti. Congress chuan, Kolasib D.C tuna 4-Tuirial bial Bye-election a District Election Officer ni bawk, Dr.H.Lalthlangliana chuan, “Election vote thlak ni ah boruak thlithlaia rawn kal tum Minister te pawh an awm thin a, hei hi danin a phal lo a ni tih kan inhriattir nawn lehna a ni ber mai. Vote nei lo, bial pawn lam miten bye election neihna hmun an kal theihna dan hi kan zawng a, kan hmu lo. An kal theih lohna dan hlir chauh ka hmu a ni. Hei vang hian in hrilhnawn leh law law hi a tha kan ti’ tiin thuchhuah a siam tawh thu an thuchhuakah hian an tarlang.

MNF thung chuan Robert Romawia puh hmingchhiat tumna mai mai tiin an thuchhuahah an tarlang thung a, Minister Pu Robert Romawia Royte hian Tuirial biala kawngpui dunga khaw dang te ang thovin Hortoki hi a tlanpel a, MPF-te nen tha taka inbiain Tlawng lui kaiah, Lengpui lam atanga amah lo hmuaktu Vanlalpeka-te ho nen ram en turin Tlawng an kan a, a hma atanga an tum lawk angin nilengin Lengpui leh Hortoki inkara ram chu an enho dawn a, Lengpui lam kawng a block avangin zanriah eikhamah Hortoki lamah MPF hriatpuiin an lo haw leh dawn a ni. Minister Program hi VCP pawh hrilhlawk vek niin, Hortoki-ah a din muan dawn loh avangin VCP hian MPF emaw Party emaw pawh a lo hrilh lo nghe nghe a ni," an ti ve thung.

Congress chuan, Minister Robert Romawia Royte leh a thuihruaite hi sorkar dan bawh chhiain Tuirial bial chhungah an awmlui ngei tih finfiahna thlalak pawh an nei niin an sawi a. Hmuh an nih hun, zing dar 6 vel atanga chhutin nizan (Oct 29,2021) lamah pawh Tuirial bial chhungah hian an riak lut ngei tawh niin a lang, an ti.

MNF thung chuan, Minister Robert Romawia hi Anthurium Festival-ah Khuallian niin tukin zing dar 3:45am khan Thimmuk Zau, Hortoki hi panin zing  dar 5:55am velah Hortoki an thleng a, chawl miah lovin an tlang nghal a ni, tiin Election Dan hian Inthlanna biala vote nei lo awm (stay) hi a khap a, vote nei lo ten a khua/area hmun danga kal tura an tlan tlang hi a khap reng reng lo a ni," an ti ve thung.