ZALEN May 27, 2025 : ZPM Thalai chuan May 26, 2025 Hnam Run inkhawmah Hachhek bialtu MLA, MNYF President ni bawk Robert Romawia Royte-a'n, "Zampui chhehvel-a cheng khuate ZPM kaihhruai sawrkar chuan thla 4 chhung lekin YMA President leh VC Secretary telin mi 85 chu Mizoram Ration Card atangin a paih,' ti a, thudik lo hmanga ZPM sawrkar a puh chu pawi an ti a, MNF sawrkar mawng a hlimah kan ngai an ti.

ZPM Thalai chuan, "Tripura sawrkar hian MNF sawrkar lai khan Zampui chehvel (Phuldungsei)-a cheng te hnenah hian Aadhar authentication, RCMS an lo ti hmasa zawk a, MNF sawrkarah khan Mizo Hnam rilru pu lo la awm chu nise he thil hi Zampui Tlang dung khaw hrang hrang a mipuiten harsatna an tawk lo turah kan ngai a ni. Ram leh Hnam rilru pu tlat kan Supply Minister B. Lalchhanzova chuan Mizoram khua leh tui humhim nan hma la in, chhungkaw 21-a mi 85 tan Manual Ration Card a pe nghal a ni. Thlatin AAY quota buhfai kg 35 chu chhungkaw 21 hnenah an pe ziah bawk a ni. Tin, heng mi 85 te hi Tripura atanga inpaih tir tura ngen a ni," an ti.

"Hachhek bialtu MLA Robert Romawia Royte hian Assembly Session-ah Phuldungsei khua a Ration Card chungchang mawi leh mawilo pawh thlu loa a sawi chhuak chu FCS&CA Minister B. Lalchhanzova'n hawihawhawm leh mawihnai takin Robert Romawia Royte- a thu hi a lo senghawi fel tawh kha a ni a, thil chinchang hmuthiam chinte chuan FCS&CA Minister B. Chhanzova thil sawi dan kha zahawm an tiin, Robert Romawia kha zak thei chi chu ni se zak ve hle turah an ngai a, Thudik lo hmanga Politics khelh hi Kalphungthar hunah chuan Mizo mipui ten an kham tawh tih hi ZPM Thalai Hqrs chuan kan chah duh a ni," an ti bawk.