Indian football team coach Igor Stimac chuan a forward chhuanvawr, Mizo tlangval, Lallianzuala Chhangte a fak nasa khawp mai a, ‘an ram tana khawvela Portuguese star Cristiano Ronaldo a pawimawh tluk zetin India tan a pawimawh’ niin a sawi.

India hian Bengaluru khawpuiah SAFF Championship an khel mek a, Stimac chuan Lza hi ‘very special’ a tih bakah ‘entawn tur dik tak’ niin a sawi.

Croatian coach hian kum 26 mi, Mizo tlangval chungchang hi Hindustan Times-in an kawmnaah a sawi chhuak a, “Chhangte (hnam dangin an sawi/koh dan) leh (Naorem Singh) Mahesh te hi player tha bik an nih avangin final third-a duhthlan tur kan neih an ni,” a ti.

“Season an hman zawh taka an chet dan leh club-a coach-ten an rin ngamnain nasa taka puiin hahdam leh tangkai taka khelh dan a siamsak a. Anni kan pho chhuak thei leh national team-a kan nei hi a ropui hle a. An kianga khel pawhte, an talent leh an inpekna zawng zawng pawh ka fak a ni,” a ti.

“Chhangte hi a pawimawh tak zet a, Indian football hmabaka player pawimawh ber a nih loh pawhin professional football-a entawn tha (role model) a ni. Khawvela Ronaldo huhang ang bawk hi nakina India-a Chhangte dinhmun tur a ni,” a ti.

Mizo winger, a tlan chak theih em avanga ‘Mizo Flash’ tia an sawi mai thin, Lza hian India Under-19 leh Under-23 tana a khelh hnuah SAFF Championship 2015 atang khan senior team tan a inlan tan a. Indian Super League (ISL)-ah Mumbai City FC player tangkai ber a ni bawk.

2022-23 season liam taah khan ISL-ah hian Golden Ball hial a dawng a, Mumbai City tan ISL League Winners Shield lain goal 10 a thun a, a thiante tan goal ruk a thunsak bawk.

India coach Stimac-a hian tun tuma a fak hma pawh hian Lunglei tlangval hi a lo fak tawh thin a. Tun thla tir lama Odisha-a Hero Intercontinental Cup 2023 an khelh lai khan ‘a chanchin hi movie-a siam tlak hial’ tiin a lo sawi tawh.

“Ni tina tih turah a thawk rim a. Chhuan lo thar zel tur, India senior team-a lo dak lut leh kawngka lo kik mekte tan a chungchang hi movie-a siam hial tlak a ni. Amah atang hian professional mawhphurhna zir tur an nei ang,” a ti.

Stimac-a hian a hma lawka Lza goal thun chungchang pawh sawiin, “Pathianni khan Mumbai City tan goal a thun kan hmu a; mahse, a hma ni ruk leh a chanve chhunga Pathianni atana a thawhrimna erawh kan hmu lo. Kan fak tur a ni a, a kal zel pawh ka beisei,” a ti a ni.