Aizawl June 19, 2022 : Sakawrhmuituai tlanga skywalk leh Chaltlang- Durtlang inkara ropeway siam chung chang-ah thubuai 2 Mizoram Lokayukta ah a lut tawh a, thubuai chhuitu, Anti Corruption Bureau (ACB) chuan chhui hna (preliminary enquiry) an la kalpui zel a, chhui zawh hun tur an la sawi thei lo.

Thubuai chhui tura Mizoram Lokayukta in a ruat, ACB hotute hnen atanga ZALEN thudawn danin, ropeway siam hna thawktu contractor, Joint Venture, NEIP Projects and Ropeways & Resorts Pvt. Ltd, New Delhi hotute chu Mizoramah koin vawi 3 thu an zawtfiah tawh a, tualchhung lam atangin thubuai kaihhnawih department lam mite bakah, mi thenkhat dangte pawh thu zawhfiah an nei tawh bawk.

ACB hotute chuan an thil chhui chu regular case a la nih loh thu leh preliminary enquiry chauh a la nih thu an sawi a, sywalk leh ropeway siamna hmun pawh vawi 3 an tlawh tawh thu te, document zirchian tur leh enfiah turte a tam tham avang -in hmalakna a chak lutuk thei lo tih an sawi.

Sakawrhmuituai tlanga skywalk leh Chaltlang-Durtlang inkar ropeway siam chungchang-ah hian kumin February 4 khan Mizoram Lokayukta ah tourism department chuan complaint an thehlut a, hemi hma, nikum November ni 24 khan MNF party a Vigilance department leh Legal Board te chaun complaint an lo thehlut tawh bawk.