Aizawl August 5, 2022 : Commonwealth Games-a India tana Gold Medal la, Weightlifter Jeremy Lalrinnunga, August ni 8-a Aizawl-a lo hmuah dan tur vawiin khan Sports & Youth Affairs Minister Robert Romawia Royte hovin Sports & Youth Affairs Conference Centre-ah sawihona neih a ni.

Jeremy Lalrinnunga chu Mizoram sawrkar leh Mizo mipui ten a phu ang taka Lengpui airport-ah ropui taka lo hmuah ni se, tiin Sports Minister hova meeting chuan a rel a. Lengpui airport-a lo hmuah dan tur te, airport atanga Aizawl khawpui panpui leh khawpui fanpui dan tur te, an chenna Ainawn Veng thlenpui dan turah te ruahmanna siam turin Organising Committee din a ni.

Jeremy Lalrinnunga hi India Youth Olympics Gold Medalist hmasa ber niin kum 2018 khan Mizoram sawrkar chuan amah lawmpuina leh weightlifting infiamnaa dinhmun sang zawk a thlen theihna atan cheng nuai 15 a pe a. Tun tumah hian Aizawl-ah a cham rei hman dawn loh avangin amah lawmpuina programme pawh hun remchang danga la buatsaih tur a ni. August ni 9 hian Chief Minister-in thingpui a inpui ang a. August ni 10 -ah Chief of Army Staff hmaa inlan turin Aizawl a chhuahsan leh nghal dawn a ni.