Aizawl: Mizoram Lok Sabha MP C. Lalrosanga chuan Manipur buaina chungchangah a thawhpui hmarchhak MP-te hmalakpuiah sawmin buaina tuartute hmun him lama thiarchhuah leh enkawl dan turte a sawipui a. Churachandpur bialtu MLA-te a be bawk.

Inner Manipur bialtu Union Minister of State for External Affairs leh Education Dr. Ranjan Rajkumar Singh leh Outer Manipur bialtu Dr. Lorho Pfoze te nena an inbiaknaah Manipur a?anga state dang mi leh sa thiarchhuah dante a sawipui a. A bik takin Imphal-a CRPF camp-a sahimna zawnga tlan lutte ei leh in pek that a tul thu leh Churachandpur lama kal duhte tana venhimna leh lirtheite ngaihtuahsak turin C. Lalrosanga chuan a ngen a ni.  Manipur MP-te chuan theihtawp an chhuah zel tur thu an lo hrilh.

MP Rosanga hian Churachandpur bialtu MLA Paolienlal Haokip nen pawh inbiain hmalak zel dan tur sawidun tura Aizawla inhmuh an tum a. Manipur atanga Mizoram lama haw duhte tana thlawhna leh lirtheia kalna ruahman chungchang pawh Chief Minister Zoramthanga biain a sawipui bawk.

C. Lalrosanga hian Manipur buaina chungchangah Union Home Minister leh Union Home Secretary office a bepawp ve reng bawk a ni.