Aizawl: Rajya Sabha MP K.Vanlalvena chuan New Delhi ah Mizoram mamawh bawhzuiin Union Ministry a Secretary pahnih a kawm.

MP K.Vanlalvena hian Zirtawpni tlai dar 3 khan Union Ministry of Earth Science Secretary Dr Rajeevan chu a chamber-ah a kawm a, Dr Rajeevan hi Scientist pakhat Dr BK Bansal-a’n a lo tawiawm a ni. MP chuan Earth Science Secretary hnenah hian proposal pahnih a thlen a. Mizoram khawchhak lama linghin thin dan data leh India sawrkar atangin a hmun ngeia kala rawn endiktu tur 'investigation team' tir turin a ngen a. Hei bakah hian, Pachhunga University College-in lirnghing chungchang zirchianna tura project an lo thehluh tawh Central sawrkarin a lo hnawl tawh hnu chu tharthawh leha approve-sak turin ngenna a theh lut bawk. Dr Rajeevan leh a thawhpui Dr BK.Bansal-te chuan kum 2000 hnulamah NE area-ah small siesmic change a awm thute sawiin, Mizoramah fault system pahnih a awm thute an sawi a. Mizoram chungchang bik chu a hma aia serious zawka an lo ngaihtuah tur thute leh Investigation tirh chungchang pawh meeting-a an lo ngaihtuah tur MP hi an hrilh a ni.

Zirtawp tlai dar 4:30 khan K.Vanlalvena hian Ministry of Tribal Affairs Secretary Deepak Khandekar chu a chamber-ah a kawm leh a, Mizoram sawrkarin project a lo thehluh tawh, lockdown avanga pending project pahnih a bawhzui nghal a. Tribal Affairs Secretary chuan NE state-te zingah Mizoram chu project thawk tha ber an nih avanga tanpui tura an inpeih reng thu leh project chu Mizoram sawrkarin a chhan tur lehkha pakhat chhanna an hmuh hunah Fund Release nghal a nih tur thu a lo hrilh a ni.

Rajya Sabha MP hi Additional Resident Commissioner David Lalthantluanga’n a tawi-awm a ni.