July 27, 2022; Mizoram sawrkar a Animal Husbandry and Veterinary (AH&Vety) chuan, Rs. Nuai 40 chuang sengin Mobile Veterinary Unit 26 a lei fel tawh a, senso zawng zawng sawrkar laipui tum vek niin, a enkawl hna thawktu turte pawh lakfel thuai tum a ni. 

Sawrkar laipui a Department of Animal Husbandry and Dairying, Ministry of Fisheries, Animal Husbandry and Dairying, Govt. of India chuan ran vulhtu ten an kawtkai ngeiah veterinary service awlsam zawka an hmuh theihna turin, Livestock Health and Disease Control hnuaiah state tin tan Mobile Veterinary Unit pek turin a ruahman a, pek dan tur guidelines ah chuan Livestock population nuai 1 zelah MVU pakhat zel a ruahman.

Mizoramah Livestock population a hniam hle a, ruahmanna angin pek ni ta se, MVU hi 5 pawh Mizoramin a dawng thei lo. Department thahnemngaihna in, RD block anga pek turin sawrkar laipuiah dil a ni a, Mizoram dilna pawmsakin, RD block 26 tan MVU hi phalsak a ni.

MVU 26 lei nan sawrkar laipui chuan kum 2021-22 khan cheng nuai 416 a rawn pe a, hei hi 100% sawrkar laipui tum a ni. Hemi bawhzui hian department chuan GAD phalna lain, sawrkar duh dan angin GEMS portal kaltlangin ni 23.2.2022 khan tender chhuah a ni a, ni 28.2.2022 ah purchase order siam niin, tender chhuah angin Force Skylar motor 26 lei turin tihfel a ni a, motor 1 man Rs. 15,70,912 a ni. Motor 1 zel lei nan sawrkar laipui chuan Rs. nuai 16 a ruahman a, a bang Rs. 29,088 chu registration leh branding atana hman tur a ni.

Tun dinhmunah MVU 26 te hi Aizawl a rawn thleng vek tawh a, dealer LBS Suzuki te stockyard Durtlang (Immanuel Boarding School chhak) ah dah a ni. Dealer ten motor registration an tih fel ve leh a man hi pek a ni ang a, motor man tur hi cheng nuai 416 department account a awmsa a ni.

MVU 1 zel in Doctor 1, VFA 1 leh driver 1 a kalpui a, hemi atan a hna lak phalna pawh DPAR leh Finance department remtihna neih a ni tawh a, hnathawktute hlawh tur chu 90:10 sawrkar laipui leh Mizoram sawrkar tum tur a ni. Heng hnathawktute hlawh tur leh motor enkawlna tur hi sawrkar laipui ah thehluh a ni tawh a, sawrkar laipui chuan motor man senso cheng nuai 416 tih fel ve leh, recuring expenditure tura department in proposal a thehluh tawh hi rawn release thuai an tum.

RD block hawn thar Tlabung leh Kawrtethawveng tan pawh MVU hi sawrkar laipui ah dilna thehluh tawh a ni bawk a, sawrkar laipuiin a rawn pek ngei beisei a ni bawk.