ZALEN December 2, 2024 : Mizorama kraws lian ber tur, Rs. Vbc. 2 senna tura ruahman, feet 101-a sang tur chu Aizawl Theological College (ATC) hmunah siam mek a ni a, tun thlengin zaa 50 (50%) vel zawh tawh a ni.

ZALEN thudawn danin, Synod Executive Committee (SEC) (13.11.2018) remtihna anga siam hnathawh mek, Aizawl Theological College (ATC) hmuna kraws lian siam hnathawh mek hi August 31, 2020-ah hna tanna leh hnatlang hmasa ber neih a ni.

Kraws lian siam mek hi za-a 50 bawr vel thawh zawh a ni tawh a, hmabak a la tam hle.

Kraws lian siamna tur pawisa chu Synod-in a hranpain budget a siam a ni lo a, kohhran, mi mal/chhungkua, pawl leh hriatrengna (memorial) pual, anniversary/jubilee pual atangin thilpek a lut a, chumi hmang chuan thawh thin a ni.

Siam zawh hun tura ruahmanna siam chhin chu a pel tawh a, hei hi duh anga hmalakna tur sum a luh that/chak tawk loh vang a ni.

Kraws lian din thu hi September 10, 2018-ah Theological Education Broad (TEB) Building Sub-Committee-in a ngaihtuah tan a, SEC-ah a thlen a. SEC chuan ‘mi mal leh kohhranhote atanga sum thawh khawm hmanga din ni se,’ a ti a ni.

Kraws lian hi ATC main building kawt, Aizawl khawpui atanga lang thei tura din a ni a. A san zawng feet 101, a kraws ban zau zawng feet 30, a base zau zawng feet 57 ni tura ruahman a ni.

A kraws foundation hi feet 12-a thuka laih niin a hnuaiah fianriala Pathian pawl duhten an hman tur hall siam a ni bawk.