Aizawl: Health department thuchhuah chuan sample test na atana senso tam leh enkawl hautak zawk RT-PCR bun belh zel ai chuan Truenat khawl bun belh mai hi tha zawkin sawrkarin a hria a. Chief Minister pawhin Truenat khawl hi Aizawl pawn District tinah pakhat zel dah turin lei a rem ti tawh niin an sawi.

Nimina thuchhuah an siamah Health department chuan Covid 19 hri vei leh vei lo endikna khawl tha ber ni a ngaih chu RT-PCR khawl a ni an ti. Hripui thawm kan hriat tirh khan ZMC-a TB Laboratory BSL-2 buatsaih fel tep tawh beh-chhanin, khawl mamawh tul ang angte la khawmin mithiam bik (Expert) te kaihhruaina hnuaiah hun reilote chhungin RT-PCR khawl chu bun fel a ni. IBSD, Imphal, Manipur atangin khawl pakhat min rawn hmantir hlauh mai a. Hauva & Sons ten hetiang khawl pakhat leina tur sawrkarah an rawn chhunglut bawk a, khawl hi lei tawh niin hman mek a ni,' an ti a. NHM hnuaia lei RT-PCR khawl pakhat pawh alo thleng tep tih sawiin, 'Tunah hian khawl pathum in ngawrh takin hna an thawk a, an thawh chak leh zual theihna turin Automated RNA Extractor pawh pakhat lei a ni a, Forensic Science Laboratory, Aizawl atangin hawh a ni bawk a. Lunglei-ah Truenat khawl pahnih in hna a thawk reng bawk a, a dang pakhat pawh bun fel leh tawh a ni. Sample endikna pui ber ZMC-ah chuan sample lakkhawm sa zawng zawng pawh endik zawh a ni tawh nghe nghe a ni,' an ti.

MLA-te leh mi inphal thenkhat ten RT-PCR khawl leina atana sum thawh an inhuam thu an rawn au chhuahpui thin a, sawrkarin lawmthu a sawi, an ti. RT-PCR chungchang sawiin, "Tuna kan dinhmun thlirin, RT-PCR khawl neih belh zel hi kan mamawh ber a ni em tih uluk taka zir chian hmasak hi sawrkarin tulin a hria a. Expert Team, Lunglei, Siaha leh Champhaiah tirh a ni a. RT-PCR dahna tur hmun (room) chu an nei ngei a, amaherawhchu heng room- te hi nasa taka chei that ngai an ni a. Khawl bun nan laboratory equipments engmah an nei lo bawk a, ngaihtuah chawp vek ngai a n,i" an tih bakah RT-PCR khawl hian ken tel tam tak a neih bakah ICMR phalna a la mamawh cheu niin an sawi.

Thuchhuah chuan tuna khawl pathum awmsa bakah a dang pakhat lo thleng leh mai tur ngaihtuah chung leh COVID-19 sample lak tur lo tlem chho ta zel thlirin, hetiang khawl neih belh zel ai chuan Aizawl District tih loh District Headquarters zawng zawngah Truenat khawl dah mai hi Expert Team te ngaihdan a ni zawk a, hun lo kal zel turah pawh a tangkai thei hle dawna ngaih a ni tih an sawi bawk.