Aizawl : Health & Family Welfare Minister Dr. R. Lalthangliana chuan mi thahnemngai RT-PCR sawrkar rawn pe duh an tam a, kan lawm em em rualin ngaihtuahna uluk zawka sen a ngai tih a sawi a, COVID-19 swab sample test tul te test zawh fel thawkhat a ni tawh a ti bawk.

Zirtawpni khan Congress Legislature Party (CLP) leader Zodintluanga, MLA chuan Lunglei Civil Hospital (LCH)-a hman turin Germany siam Thermo Fisher 7500 Real Time PCR chu Lunglei DC (District Level Task Force, Chairman) hnenah a hlan a, hemi hnu hian hospital-ah hian unload a ni a, mahse, LCH lam hian sawrkar lam atanga pawmpuina an hmuh loh avangin he khawl hi Zirtawpni tlai vek khan DC Office lamah an dah let a ni. Hemi chung-changah hian Health Minister Dr. R. Lalthangliana chuan, "Mi thahnemngai ten RT-PCR khawl an donate duh thu sawrkarah an rawn thlen thin a, an thahnemngaihna a fakawm rualin inthlahrung taka kan hnar a ngai thin a ni. RT-PCR khawl hi lei mai theih pawh ni se, a khawl bakah hian ken tel tam tak a nei a, mithiamte chhut dan chuan khawl bun tur hian RT-PCR khawl nuai 20 man vel chhut telin a vaiin Rs nuai 100 vel sen a ngai a ni," tiin sawrkar thuchhuak chuan a tarlang.

Heng khawl hi enkawl a hautak thu a sawinnaah Dr. Thangtea chuan, "Heng khawl hi Medical College, University, Science College leh Central Research Institution Laboratory nei ah te RT-PCR hi harsatna awm lem lovin a dah theih mai a, Indian Council of Medical Research (ICMR) hian hetiang institution-based ni lo damdawi in emaw hmun danga RT-PCR khawl bun tur chuan nikhatah sample 100 test ziah tur a ni, tih dan an lo nei a. Sample test tura bawlhlo ngai zawng zawng nen ni khata sample 100 test na man hi Rs. nuai 7 vel a nih thu mithiam ten an sawi. Hetianga nitin test theih loh chuan ICMR hian test kalpui phalna licence an tih tawp sak thin a. Heng bakah hian khawl dahna tur laboratory siam a hautak em em a, a enkawltu tur doctor, Scientist leh Lab Technician bakah midang thahnem tak a mamawh a, full time a vil tur chuan ZMC laboratory a khawl pakhat pawh saw mi 25 bawr velin an buaipui a ngai a ni," a ti bawk.

Thorang bialtu MLA Zodintluanga khawl lei hi sawrkarin an pawm leh pawm loh chungchang ZALEN-in a zawhna chu Dr. Thangtea hian, "Kan pawm chu a ni ber alawm, DC in a lo dawng sawng a, sawrkarin a kawl thlap alawm," tiin a chhang.

Health Minister chuan Sample test chung-chang pawh sawiin, "Test tur hlawm lian kan zo fel tawh a, kan quarantine facility hrang hrangte pawh a ruak chho tan mek zel a, tangkhang lo haw tur an tlem tial tial a, sample test hna pawh a hautak lo chho zel dawn a. Lawngtlai, Saitual leh Hnathial District te COVID-19 vei awm lohna COVID19-free district ah kan puang thei ta hi a lawmawm a ni. Hetih mek lai hian kan thla a muang sual ang tih a hlauhawm a, COVID-19 vei kan neih te an dam chho zel a, vei thar hmuh chhuah kan nei tlem telh telh a, amaherawhchu he natna hian min kian san mai dawnlo tih kan hriat reng a ngai a ni," a ti.

Mizoram pawn lam dinhmun pawh sawi kaiin Dr. Thangtea chuan, "India ramah tukin thlenga Health Ministry record ah COVID19 vei nuai 5 kan tling tawh a, khawvel pumah a vei tam pali na kan ni mek a, thla hmasa lam kha chuan India rama ni khata vei pun dan hi 4000-5000 vel te a nih thin laiin tun hnai kar hnih chho vel chu nitin sing chuangin an pung reng a, a punna hi a sang telh telh a, nimina India rama Covid19 vei hmuhchhuah thar chu 18,552 a lo ni ta reng mai a ni; hei vang hian thlamuang taka lo awm ngawt hi a theih loh a, India ramah a vawrtawp 'a peak' hun an tih hi kan la thlenglo an ti lehnghal a,kan fimkhur a la ngai nasa em a ni," a ti.

A sawi belh naah Health Minister chuan, "Kan thenawm State Assam ah pawh an thla a muang sual deuh ni in a hriat a, a bik takin Guwahati ah phei chuan Thawhtanni lo awm tur atanga karhnih chhung chu total lockdown an neih a ngai dawn a ni. Hei hi a chhan chu June ni 15 leh 25 inkar, ni 10 chhung lek khan Guwahati bikah positive 762 hmuh an ni a, an zinga 677 (88.84%) hi travel history neilo an ni a. Khawi ah hian nge kua a rawn hreuh dawn keini pawhin kan hrelo a, inven fimkhur hi kan tih theih awmchhun a ni," a ti bawk.

"Natna chimawm leh hriatchian hleihtheih loh kan hmachhawn tlat mai si a, kan fimkhur hle a ngai a, sawrkarin ruahman te tha taka kan zawm reng a pawimawh rih dawn a, mipuite pawhin dawhtheih na kan neih a ngai a, kan hotuten kan tana tha lo turin ro an rel dawn lova, thil tam tak ngaihtuah a, kil tin atanga an thlir hnu ah ruahmanna an siam thin tih hria ila, I ring ngam ang u," tiin mipui te a chah bawk.