November 28, 2022; Right To Information (RTI) dan hnuaia sawrkar department (public authority) tin te chu an website ah information tam thei ang ber dah chhuak/ tar lang tur a tih an ni a, chumi a hmala tha lo department 41 te chu Mizoram Information Commission (MIC) in a ko tawh.

Vawiin khan Administrative Training Institute (ATI) buatsaihin Aizawl press club ah RTI chung chang zirhona chanchinbumi te pualin neih a ni a, he hun a zirtirna petu MIC a Deputy Secretary, Lily sawi danin, RTI dan hnuaiah Public Authority tin te chu khua leh tuiin RTI dan hmang kher lo a information an neih theih nan information tam thei ang ber eng hmanrua hmang emawin an dah chhuak/tarlang tur a ni a, chumi atan a tha ber chu internet a nih avangin information te chu website ah dah tur a ni.

MIC a Deputy Secretary chuan Public Authority ten an website ah information an dah that leh that loh chu endik reng a ni tih sawiin, RTI dan in a phut angin Public Authority tin te chu chumi enkawl tur bik Nodal Officer ruat vek tura hriattirna pek an ni tih a sawi.

RTI dan section 4 (1) (b) in a phut angin, information dahchhuah te chu tual chhung mite tawng hman ang zela tih tur a ni a, website a information tar chhuah reng rengte chu kimchang tak, en awlsam a ni tur a ni a, a hmangtu tana hman nuam a ni tur a ni.