Aizawl; July 31, 2022 thleng khan Mizoramah Right to Information hmangin zawhna 20,399 zawh a ni tawh a. Mizoram Information Commission chhinchhiah danin RTI zawh theihna SPIO 505 an awm mek.

ZALEN-in RTI hmanga zawhna a zawh, SPIO, Mizoram Information Commission-in a chhanna atanga a lan danin DAA-te chhanna a lungawi loh vanga Mizoram Information Commission-a appeal awm tawh zat chu 90 a ni tih a tar lang a, MIC chuan heng second appeal lo lutah hian hearing neiin thutlukna siamin a ching fel tih tar lan a ni.

Mizoramah July 1, 2022 atangin RTI online kalpui tan a ni tih sawiin RTI online a thatna leh awlsam zawkna tur zawhna chu chhangin, “Mipuiten sawrkar department/office hmuna va kala RTI zawhna ziaka an thehluh ngai lovin Mizoram RTI online hmangin an phone emaw, computer emaw hmangin zawhna an thehluh mai theih tawh avangin mipui tan a awlsam phah a. Hun a heh lo va, thingtlang atang pawhin khawpui a kal kher ngai lovin zawhna a zawh theih a ni,” an ti.

August 24, 2022 thleng khan SPIO 505-te hnenah zawhna thehluh theih a ni a; mahse, SPIO zat hi la danglam thei tih chhannaah hian tar lan a ni bawk.

General Administration Department (GAD) chuan July  20, 2022 khan thupek/hriattirna (notification) tichhuakin DAA, SPIO leh SAPIO zawng zawngte chu August 12, 2022 ral hmaa in-register vek turin hriattirna a tichhuak a, mi eng emaw zat chu in-register-in training pawh pek an ni tawh a. Zalen thudawn danin in-register zat hi 300 chuang an awm tawh a, in-register lo mi eng emaw zat an la awm bawk.

RTI online hmang tur hian a mawhphurtu SPIO/DAA-te chuan training an neih a ngai a; mahse, training lo an la awm avangin la training lo SPIO-te hnenah chuan RTI online hi a la hman theih loh nia thudawn a ni.