Aizawl; Virtual Anthurium Festival 2020, Aizawla hmanna atan government of india, ministry of tourism atangin cheng nuai 25 hmuh a ni a, sum hmanna hlawm lian ber chu documentary siamna leh TV channel pali (4)-a thehdarhna man (broadcast fee) niin, hemi a tan hian Rs. 8,50,000 hman a ni.

Nikum 2020, november 10 leh 11-a virtual anthurium festival hmanna sum hmuhna leh sum hman dan RTI zawhna Tourism department chhanna atanga a lan danin, festival hmanna atan Government of India, ministry of tourism atangin cheng nuai 25 hmuh a ni a, Rs. 25,00,245 hman ral niin, sum hman bang a awm lo.

RTI chhanna a tanga a lan danin sum hmanna hlawm lian ber chu, documentary hrang hrang siamna man leh November 10 leh 11 zante TV channel pali, Zonet HD (6-11pm), Zonet Bawhbel (6-11pm), LPS 10 (6-11pm) leh DD Mizoram (8-10pm) a tihchhuahna man a ni.

Sum hmanna dangte chu insertion of English subtitle atan Rs. 80,000, recording studio hmanna Rs. 29,050, translation of Mizo to English atan Rs. 30,000, anthurium par leina atan Rs. 3,00,000, sound system for shotting etc. (3 days) a tan Rs. 1,50,000, prize money for photography contest a tan Rs. 90,000, prize money for best anthurium garden competition atan Rs. 8,000, certificate & trophy a tan Rs. 11,200, photography/press/publicity-ah Rs. 90,179 leh talk show & anthurium garden visit atan Rs. 17,000 hman a ni.

Artist 10 & bands/group 6 atan Rs. 1,98,000 hman ni bawkin, compere (2 nos) ah Rs. 20,000, 10 individual publicity partner-ah Rs. 1,02,000, transportation & HSD ah Rs. 43,970, cooking show & traditional show at Zokhua, Reiek atan Rs. 72,200, banners/frills/ standees/sticker/board & invitation including 21 location in Aizawl (main banner 16x13 feet) atan Rs.2,70,146, stationeries ah Rs. 49,500 leh shooting for happiest state atan Rs 89,000 te hman a ni.

Virtual anthurium festival kha Mizorama a hmasa ber niin, Covid-19 hri leng vanga zin vei vah leh mipui punkhawm a rem loh a vangin media partner hrang hrang LPS, Zonet, DDK te leh social media YouTube, Facebook leh Instagram katlangin livestream a ni.