Aizawl: Information & Public Relations Minister leh Aizawl West II Bialtu MLA ni bawk Lalruatkima chuan nimin zing khan Vaivakawn-Hunthar-Chanmari West lei tawlh avanga khawtlangin harsatna an tawh dan a hmunah a en.

Minister Lalruatkima chuan lei che avang hian building eng emaw zat thiah tawh a ni a, chhungkua 30 chuang zetin an chenna in an chhuahsan tih sawiin helai hmun hi uluk taka zir chiang turin leh thal chhunga tui luanna mumal zawk leh kawng siam that dan tur District Disaster Management Authority, SIPMIU, PWD leh khawtlang hruaitute nen sawi khawm leh ni se, a ti a. Helai kawng hi inkalpawhna pawimawh tak a nih avangin sawrkar chuan a ngai pawimawh tak zet tih sawiin, khawtlang hruaitute pawhin ngaihtuahna zau tak neia, sawrkar ruahmanna te thlawp turin a sawm a ni.

Hunthar lamah piling, drainage system leh check dam te siam mek a ni a, helai hmuna lei chhung chet dan hi kan hriatthiam loh thil a nih avangin, harsatna kan tawk a, chung ang chu hriain, mipuite pawhin thuneitute hmalakna lo ngaichang thiam turin Minister chuan a ngen.