ZALEN August 19, 2025 : Bairabi Sub-Divisional (Civil) Conference Hall-ah tunhnaia Mamit District Saikhawthlir khaw bula Rubber kung phun Assam Police leh Forest Department-te'n an tihchhiat chungchangah District pahnihte DC leh SP te'n inbiakna an nei a, DC pahnih ten thiamthu an sawi ve ve.

He hun kaihruaitu Mamit Depurt Commissioner K. Laltlawmlova, MCS chuan Mamit District chu Reserved Forest Area huam chhunga a awm thu leh Mamit District chhunga mipuite chuan Reserved Forest Area hmang tangkai turin dikna chanvo tam tak an neih thu a sawi a, tunhnaia Assam Police leh Forest Department-te'n Saikhawthlir khaw bula Rubber kung phunte an tichhiatna hmun chu Kawrthar Forest Division hnuaia awm a nih angin GIS Cell, EF&CC Department Mizoram in Map a siam chhungah a tel thu a tarlang bawk.

He thutkhawmah hian Hailakandi Deputy Commissioner Abhishek Jain, IAS chuan tunhnaia Saikhawthlir khaw bula Rubber chingtute'n buaina a tawhna hmun chu State Ramri chungchanga buaina a nih loh thu leh Reserve Forest Area a Plantation kalpui a nih avanga zawka inhriatthiam lohna thleng a nih thu a sawi a. Helai hmun hi Inner Line Reserve Forest, Gharmura Range, Hailakandi District huam chhung a nih thu leh Reserved Forest Act 1980 hnuaia humhalh niin hemi Act a Section 2A chuan Rubber kung leh thil dang phun a khap tlat thu sawiin Assam Police leh Forest Department-te'n tunhnaiah helai hmuna Rubber kung phunte an tih chhiat chhan chu a sawifiah. Assam State chhungah Kilometre 1.5 vel a thui Rubber kung in phun hi Forest Conversation Act 1980 kalh a nih theih dante leh National Green Tribunal (NGT) ngaihmawh tak a tlin theih thu he hunah hian a tarlang bawk.

He thutkhawmnaah hian tha taka buaina chinfel dan tur leh hun lo kal leh zelah pawh buaina dang a thlen nawn tawh loh nan ruahmanna fel zawk siam dan tur ngaihtuah nise tih a ni a, thuneitu sang zawka thlen dan ngaihtuah nise tih a ni bawk.