ZALEN February 9, 2025 : Nikum October 24-a R.Dengthuama Hall-a YMA Rorel Inkhawm vawi 4-nain, “Ruihhlo dona khawngah nasa zawk a hmalak ni rawh se,” tia a lo rel tawh angin Zirtawpni zan khan Central YMA buatsaihin Vanapa Hall-ah ruihhlo do infuihtharna hun hman a ni a, Lengpui Airport leh AR ram chhuansan turah resolution an pass bawk.

Infuihtharna hun hi Prof. Lalnuntluanga, Vice President, CYMA-in kaihruaiin Roneihthanga, Treasurer CYMA-in hunserh a hmang a, Prof. Malsawmliana, General Secretary, CYMA hnen atangin inhmelhriattirna leh report ngaihthlak a ni.

Ruihhlo do infuihtharna hunah hian Central YMA president lo ni tawh pathum - J.H Zoremthanga, Lalbiakzuala leh Vanlalruata te bakah president ni mek, Lalhmachhuana hnen atangin ruihhlo dona nasa zuala kalpuina tur kawnga hmalakna tur kawng hrang hrang ngaihthlak a ni a. Central YMA President chuan ruihhlo do turin YMA hruaitu leh member te, nu leh pa, Kohhranho te thahnemngai taka pen chhuak tur leh ruihhlo dopui turin a sawm.

Kal khawmte atangin zawhna leh chhanna hun hman niin Fabian Lalfakawma, Asst.Secretary, CYMA-in lawmthu sawina hun a hmang bawk.

Ruihhlo do infuihtharna hunah hian Aizawl khawpui chhunga YMA branch 109 atangin hruaitute leh branch hrang hranga Kumpuan Sub-Committee mi 900 bawr vel an kal khawm a, a hnuaia mi ang hian resolution an pass.

1. Kan ram rohlu, Lengpui Airport hi Indian Air Force (IAF) kutah hlan a nih lohna tura Central YMA leh NGO Coordination Committee-in hma a lakna hi kan thlawp a, IAF kuta Lengpui Airport hlan hi kan rem ti lo a ni.

2. Aizawl khawpui lailia awm mek, Assam Rifles-te an chhuah hunah an awmna hmun, Lammual leh a chhehvel hi mipui vantlang tana tangkai taka hman anih theih nan leh mi mal, pawl, political party leh kohhranten remchang la lo tura Central YMA hmalakna hi kan thlawp a, theihtawp chhuaha hmalak zel tha kan ti.