ZALEN, Mar. 22, 2025: YMA-in ruihhlo dona kawnga hma a lakna kal zelah Inrinni khan Aizawl khawpuia branch YMA-te chuan an huam chhung theuhvah ‘ruihhlo do hnatlang rûnpui’ an nei.

Branch eng emaw zat chu zingkar atangin thawk chhuakin zan lam thlenga thawk tur pawh an awm. 

Hnatlangah hian branch thenkhat chuan ruihhlo that lohzia tar lanna poster an tar a. Thenkhat chuan ruihhlo ngaite awmkhawmna hmun an tifai a, ruihhlo ngaite counselling pein ruihhlo eng emaw zat an man bawk.

Branch thenkhat chuan tleirawl kokhawmin ruihhlo leh HIV/AIDS chungchang inzirtirna hun an hman bawk. 

Central YMA hruaitu hnuaia ruihhlo do pawl, Central Anti- Drugs Squad (CADS) pawhin hnatlang hi an vil a, branch eng emaw zatin ruihhlo leh inhnamhnawih an man chhui zui ngaite an hnenah hian an thlen nual a, anni hian an chhui zui nghal bawk.

Aizawl khawpui chhungah hian YMA branch 109 a awm mek a, Branch thenkhat mitthi leh programme neih laklawh avang hnatlang ve thei lo an awm a, anni pawh hian hun remchangah hnatlang an tum. 

Hnatlangpui hi YMA Rorel Inkhawm 2024 khan ‘Ruihhlo do kawngah YMA-in tun aia chak zawkin hma la rawh se’ tia a lo rel tawh bawhzuina pakhat niin Central YMA chuan hnatlang buatsaihtu branch-te chungah lawmthu a sawi a, an huam chhung theuhvah hnatlang hi kalpui zel turin a chah bawk.