ZALEN March 4, 2025: Vawiin khan Lalrinpuii, Social Welfare & Tribal Affairs Minister chuan I&PR Conference Hall, Lianchhiari Runah, Ruihhlo hman khawlohna laka invendan tur zirhona hun 'Capacity Building Programme on Drugs Abuse Prevention' chu khuallian niin a hawng.

Hawnna hunah hian khuallian Minister Pi Lalrinpuii chuan thusawiin, Ruihhlo chu Mizoram leh hnamin a chhiatpui nasat em em leh hmelma lian ber a ni tih sawiin, chumi dona kawnga inzirtirna hun hman chu a pawimawh hle tih a sawi a. Sawrkar ang pawha ruihhlo do chu an thupui ber a nih thu leh, chu lama an thawhpui Home hrang hrang leh ruihhlo ngaite enkawlna hmun hrang hrangte chu tun aia tha leh zuala sawrkar thawhhopui tura sawmin; ruihhlo do chu kohhran angte, sawrkar leh tlawmngai pawl angte pawha tangruala do ngai a ni tih a sawi a. Department-a thawktute inpekna fakawm a tih thu sawiin, kalkhawmte chu Department thawhhopui kawngah tan la leh zual theuh turin a ngen nghal bawk a ni.

Programme hawnna hunah hian Social Welfare & Tribal Affairs, Women & Child Development Department hotute bakah, kohhran hrang hrang hruaitute leh tlawmngaipawl thenkhatte, ruihhlo do kawnga thawktute thahnem tak an tel a. hawnna hun hman hi Dr.Lalhriatzuali Ralte, Director, Social Welfare & Tribal Affairs chuan kaihruaiin, kalkhawmte lo lawmna thu leh hun hmandan tur tlangpuite a sawi a. Kalkhawmte hnen atangin programme hman chhunga an beiseinate ngaihthlak a ni a. Pi Ruth Vanlalsawmi, Jt. Director, SWTA chuan lawmthu sawiin hun hman hi a khar a ni.