India chanchinbu lian, Times of India (ToI) chuan Thawhlehni khan Hyderabad, Telengana-ah ruihhlo kaihhnawihah Mizoram mi panga an man tih an tar lan chu Hyderabad Mizo Association (HMA) chuan an hriatpui loh thu leh tute nge an nih pawh an hriat loh thu an sawi.

ToI-in a tar lan dan chuan heng mite hi an Banjara Hills-a an chenna (flat)-ah luhchilhin an man a. Nachhawkna chi khat, Nitravet mum chu damdawi dang pahnih, Tydol leh Tramadol nen tui nena chawhpawlhin inchiu nan an hmang thin a ni.

Police hnena an inpuan dan chuan Mizoram atang thova kal mi pakhat atangin ruihhlo tih hi an ching tan a. Ani a kal bo hnu hian doctor phalna nei lovin tual chhunga delivery boy kaltlangin an chah zui ta thin a ni.

A tirah chuan damdawi mum chu an ei thin a, a aia thawk na zawk duhna avangin tih dan dapin damdawi dang nen an chawlhpawlh a, inchiu nan an hmang zui ta niin tar lan a ni.

Mi mante hi hmeichhe pathum leh mipa pahnih an ni a, thla ruk vel hetiang ruihhlo hi an lo ti tawh niin ToI chuan a tar lang a. Beautician leh masseurs an ni hlawm a, an hnena phalna nei lova damdawi petu mi pathum chu police-in an umzui mek a, an zinga pahnih hi Mizoram mi tho niin tar lan a ni.

Mi man pangate hi NDPS Act tlawhchhanin thubuai siamsak tawh an ni.

Telengana khawpuia ruihhlo kaihhnawiha Mizoram mi man an nih chungchang hi HMA chuan engmah a hranpaa hriat an neih loh thu leh chanchinbua an hmuh ang bak an hriat bik loh thu Zalen an hrilh.

HMA General Secretary H.Z.Siama chuan, “Ruihhlo kaihhnawihah hi chuan kan inrawlh duh lo va, kut kan sil law law thin,” a ti a. “Kan puihna dilin min rawn ngen lem lo va, min ngen turin an dinhmunin a zir rih lo pawh a ni thei tho bawk,” a ti a. An pawl chu tlawmngaia chet chhuah ngai ang chi a nih loh chuan hetiangah hian an inrawlh duh ngai lem lo a sawi.

Mi man takte pawh hi an pawlah an inziak lut chiah lo nia a hriat thu Siama chuan a sawi a, an zingah hmelhriattu pawh an awm lem lo nia a hriat thu sawiin, “Hetiang chiho hian min hnimhnai duh vak ngai lo, biru deuh chi an ni thin,” a ti.