ZALEN August 20, 2025: Ruihhlo donaah tha thlah lovin Police ten theihtawpin hma an la zel a, a hnuaia tarlan ang hian Mizoram police chuan ruihhlo engemawzat tunhnaiah an man:

1). Dt. 18.08.2025 khan Special Narcotics Police Station (CID Crime) leh 225 Battalion CRPF, Aizawl te chuan Muallungthu leh Hualngohmun khuaah joint operation neiin lirthei pakhat, Mahindra Bolero, MZ05-6161 atangin Methamphetamine mum, Kg. 7.955 a rit, Rs. 10,341,500 man hu an man. Ruihhlo hi lirthei hnung seat hnuai leh chhuat hnuaia pindan ruk siam chawp a lo thuhruk a ni. Mi pahnih, Shanti Jeeban Chakma (30) s/o Vinanda Chakma, Ulusury, Lawngtlai District, tuna Hunthar Veng, Aizawla khawsa mek nia inchhal leh Brighu Dhan Chakma (31) s/o Rivodi Kumar, Marpara, Mamit District, tuna Devasora, Lunglei District a cheng nia inchhal chu hemi kaihhnawihah hian man an ni. 

Special Narcotics PS Case No. 25/25 Dt.18.08.2025 u/s 22(c)/25/29(1) ND&PS Act, 1985 ziah luh niin chhui chhunzawm zel a ni.

2). Dt. 17.08.2025 zan khan, Champhai police hnuaia Hnahlan Beat Post te chuan lirthei pakhat, EECO Van (Reg. No. MZ-01-Z-6975), Hnahlan khaw dai kawng sira inhung chu enfiah tura an pan laiin a khalhtu chu ramhnuai lamah a tlanchhia a, umzui ni mah se thimthamah an man nghal thei ta lo a ni. Uluk taka lirthei hi enfiah a nih hnuah lirtheiah hian Heroin gram 240 (Hawng 23) Rs. 17,20,000/- man hu, thiam taka Crispy Wafer packet chhunga thuhruk man chhuah a ni ta a ni. 

Champhai PS Case No. 122/25 Dt. 18.08.2025, 21(b)/25 ND&PS Act hnuaiah ziah luh a ni a nih hnuah uluk taka chhui niin a mawhphurtu Ahmed Ali (26) s/o Abdul Hamit, Nilam Bazar, Karimganj, Assam chu Vapar, Champhai District-ah man a ni tawh bawk. Chhui chhunzawm mek zel a ni.

#ZalenNews