ZALEN May 6, 2025; Ruihhlo tawlha inhnamhnawih mi 4 leh an chhungte chu Champhai Kanan Branch YMA-in an veng chhung atangin an hnawt chhuak.

Thu lakna Maipawl in a tarlan danin, Inrinini zan khan Champhai Excise & Narcotics Dept chuan Heroin Hawng 4 leh a neitua puh mi 3 - Siangremthanga, Hrangthanpuia leh Siangremmawii te an man a, an chhui zuina kal zelah Nokhenthanga an man zui leh a, thu an zawhfiah hnuah Nokhenthanga tih loh mi 3 te hi Lung inah khung nghal an ni.

Hemi chungchangah hian Champhai Kanan Veng Branch YMA chuan thuchhuah siamin Champhai Excise & Narcotics Dept-in ruihhlo an mana inhnamhnawiah puh mi 4 te hi Champhai Kanan Venga raltlana awm mek an ni a. An veng tihmingchhetute hi raltlan ni mah se, Sorkar leh YMA te duh loh ruihhlo hmanga sumdawnnaa inhnamhnawih an nih avangin an chhungte chu May ni 7, 2025 ral hmaa Myanmar-a haw turin an hriattir a, an mahni pawh Lung inah khung nghal atanga an chhuah hnuah Myanmara haw nghal turin an hriattir bawk a ni. 

Champhai Kanan Veng Branch YMA chuan Mizoram chhunga Branch YMA hrang hrang te chu an huam chhunga lo awmtir lo turin an ngen bawk a ni.

#ZalenNews