September 15, 2023; Vawiin chawhnu khan Aizawl District Level Task Force on Ruihhlo Do buatsaihin Govt. T. Romana College ah Ruihhlo that loh zia inzirtirna hun hman a ni a, Nazuk Kumar IAS, Aizawl District Bawrhsap leh Chairman, District Level Task Force in Ruihhlo Do ni bawkin a hmanpui.

He hunah hian Dr Jenifer Lalbiakdiki, Principal in inlawmna thu a sawi a, Prof. Malsawmliana, Member Secretary, Aizawl District Level Task Force on Ruihhlo Do in an hmalakna report tlangpui a pe bawk.

Nazuk Kumar, IAS, District Bawrhsap chuan ruihhlo that loh zia sawiin, zirlaite chu ruihhlo ti chhin lo tur leh inthiarfihlim turin a ngen a, ruihhlo do kawnga YMA te hnathawh ropui a tih zia a sawi. Vanlalhruaii, Master Trainer, Mizoram Social Defence & Rehabilitation Board (MSD &RB) in zirlaite hnenah ruihhlo thatloh zia inzirtirna a pe.

Aizawl District Level Task Force hian Aizawl District chhunga zirna In zawng zawngah ruihhlo that loh zia zirtirna hi an kal pui mek a. A thawh khatnaah Higher Secondary School leh College ah awareness Programme hi an kal pui phawt a, High School, Middle School, Primary School leh Kohhran hrang hrang tleirawl inkhawmah te zirtirna hi neih zel an tum.