Aizawl June 11, 2023: Nikum 2022 khan Mizoramah ruihhlo vanga thi chhinchhiah mi 43 an awm a, chumi zat thuak 40 chu kumin-ah ruihhlo thihpui an awm tawh a. Ruihhlo a hluar a, a zuar an tam ang bawkin a ti pawh an tam.

Excise & Narcotics Department (END) chhinchhiah danin kumin January atanga vawiin, June 13 thlengin ruihhlo vanga thi mi 40 an awm tawh a, chung mite chu mipa 33 leh hmeichhia 7 an ni.

Nikum khan ruihhlo vanga thi chhinchhiah mi 43 an awm a, chung mite chu mipa 39 leh hmeichhia 4 an ni. 

A hrechiangte sawi dan leh dan leh thupek kengkawhtuten ruihhlo an man dan atangin Mizoramah ruihhlo, a bikin heroin a hluar a, a zuar an tam tluk zetin a tithar pawh an tam nia ngaih a ni.

END chhinchhiah danin kum 1984 atanga June 13, 2023 thlenga ruihhlo vanga thi 1,776 zinga mi 1,562 chu mipa niin, mi dang 214 chu hmeichhia an ni.

Tun ang reng a nih chhoha ruihhlo a hluar zel a nih chuan kumin hi tun hnai kum 20 chhung vela ruihhlo vanga thi tam ber kum a ni thei dawn.

Ruihhlo thihpui:
Kum    Mipa    Hmeichhia    Total
2014     36       2                   38
2015     24       3                   27
2016     50       9                   59
2017     53      12                  65
2018     44      12                  56
2019     42      13                  55
2020     61      6                    67
2021     39      8                    47
2022     39      4                    43
2023      32     7                    40
(upto 13th June)