ZALEN June 11, 2025; Nimin zing dar 4:30 bawr vel khan Champhai Vengsanga in pakhat neitute chuan an in rawk tumtu mi pahnih, unau mipa leh hmeichhia an man a, he mite chet dan hi Mizoram mai ni lo, khawvela inrawkna thleng tawhah chuan a dangdai berte zinga mi ni hial a ngaih a ni.

Thu lakna Maipawl.org -in a tarlan danin, pawikhawihtua an puhte hi Champhai Kanan Venga chengte an ni a, an nu ber bakah an man tak a fate pahnih an ni a, a fapa hi kum a la tling lo nghe nghe. An thil rukte hi hralh sumah an ti lem lo a, chu chu a danglamna lai tak leh chhui chhuah an har em em chhan pakhat a ni.

An thilruk khawm hmang hian an khawsa a tih theihna chin a awm a, chuti chungin kohhrana thilpekah chuan a thahnemngai berte zinga mi an ni lawi a, hei hi a danglam chhan leh pakhat a ni. Tun dinhmunah an pawikhawihna zawng zawng hriat chhuah a la ni lo a, an chetdan leh an chet chhan kimchang pawh hriat a la ni chiah lo.

Rukrukna thlengah chuan sum hmuhna atan te, hausakna atan te an ru ngai loa, an thil ruk chhuahte hi an mamawh tawkin a ni tlangpui a, a thenah chuan midang tanpuina atan te pawh an hmang leh thin niin an sawi.

Tum khat chu kohhran pakhatin tingtang an mamawh tih an hria a, kohhran danga mi tingtang an la chhuak a, a mamawhtute hnenah an pe mai a, hei hi thilpek a nih hi, sawi chhuah kher pawh a ngai loang tiin an hrilh. An thil ruk thenkhatte chu mi harsa zawkte tanpuina atan an hmang thin bawk niin an sawi.

#ZalenNews