ZALEN August 6, 2025 : Tunhnai a India ram hmun hrang hranga nungcha te zirchianna kal zelah Department of Zoology, Mizoram University-a Head ni mek Prof. HT Lalremsanga leh a research scholar, Lalmuansanga te chuan an thawhpui te nen Mizoram hmun hrang hrang a herpetological expedition an neihna atangin an pianphung, phuhlip inremdan leh DNA zirchianna atangin rul species thar hmuchhuakin a hmingah Smithophis leptofasciatus tiin an phuah. 

He rul hmuhchhuah thar chungchang hi August ni 5, 2025 khan international scientific journal, Taprobanica (The Journal of Asian Biodiversity) vol.14 (issue no.02) chuan a rawn tlângzarh ta a ni.

Prof. HT Lalremsanga chuan, "Khawvel pumah Smithophis rul te hi species 5 hmuhchhuah tawh niin India hmarchhak leh a chhehvelah te hmuh an ni a. Mizoram atang hian species thar 2, Smithophis atemporalis leh Smithophis mizoramensis te kan lo hmuchhuak tawh a. Tun ami described thar hi Meghalaya atang kum 1855 daih tawh a hmuhchhuah tawh, Smithophis bicolor anga ngaih a ni char char thin a ni."

"Amaherawhchu, ngunthluk lehzual a zirchian a nih hnuah an pianphung thenkhat leh DNA ah ringawt pawh 11.5% lai a an lo danglam avangin species hran daih leh a thar alo ni reng a ni tih hmuhchhuah thar a lo ni ta a. Heng rul te hi an biology hriat tur mumal ala tlem hle a, rul tur nei lo chi niin changpat an duh hle a, ruahsur laiin rampalaileng leh ngaw hnuai, tui awmna bul leh a velah te an lo chhuah thin avangin Ruah lawm rul an ti a. Tun a species hmuhchhuah thar pawh hi Ruah rul tiin kan vuah a ni," a ti.