Aizawl: Divisional Forest Office, Kolasib Division chuan nikum August ni 10 a khuavang rul (black krait) in a chukhlum Lalrintluangi (65) chhungte ralnan Rs. nuai 2 a hlan.

DFO Kolasib Division hian Ningani kalta khan Wildlife Compensation an semchhuak a, Wildlife Compensation chu ramsa te chetna avanga a tuartute hnena chhawmdawlna pek thin a nih thu leh central fund atanga pek thin a nih thu Forest deptt. thawktute chuan an sawi a, hetiang compensation dawng thei awm chi an awm chuan a bialtu Range Officer ten DFO Office-ah an thlen a, chhawmdawlna pektlak nia an hriatte chu Aizawl lamah an thawn ve leh thin tih an sawi bawk.

DFO, Kolasib hian mi 12 hnenah Wildlife Compensation hi an pechhuak a, an semral zawng zawng hi Rs. 257,413/- a ni. Nikum 2020 chhunga thil thleng deuh vek a ni a, ramsa in kel a seh sak pakhat hi June 14, 2019 lama thilthleng a ni thung. Compensation dawngtu zingah 9 hi ramsa ten an thlai an tihchhiat sak an ni a, buh neitute an ni deuh vek bawk. Rulchuk hi mi pahnih awmin pakhat erawh na lutuk a ni lova, enkawlna deuh ngawr ngawr chauh zangnadawmna pawh pek a ni.