Aizawl: MPCC Media chairman Dr. Lalianchhunga chuan, "Ruling Party Unit /worker te hnathawh endiktu atan opposition Village Council/Local Council an tha ber a ni," a ti.

Nimin khan Aizawl Press Club-ah Press mite kawmin MPCC Media chairman Dr. Lalianchhunga chuan, "Khawtlang hmasawn nan rorellai Village Council/Local Council neih kher a ngai lo va, ruling Village Council/Local Council neih aiin khua/veng hmangaih-tu leh mi inpe neih a tha zawk. Contract inchuh a phe buai mai mai tur ruling neih ringawtin awmzia a awm lo a, ruling VC/LC hnuaia ruling Party Unit ten hna an thawh a tha thei tak tak lo a ni," a ti.

Lallianchhunga chuan 15th Finance Commission in kum 2020-2021 chhung atan Village Council te hman tur Rural Local Body Grant cheng vbc. 93 a pek thu leh Mizoram State Finance Commission rawtna angin State thawhchhuah (Annual State Own Revenue) atanga 15% chu tual-chhung sawrkar chanvo tur a ni tiin, "Sum hi rorelna chang mektu (ruling) leh eptu (opposition) pawhin an dawng vek dawn a ni," a ti.

National Food Security Act (NFSA) Beneficiary Selection Committee member ruat danah party induhsakna a nasa hle niin a sawi a. "He Committee a tel tur khawtlang mizah-awm (Prominent Citizen) 2 pawh ruling party worker atangin ruat an ni a, term hmasaah chuan prominent citizen aiawh turin YMA, MUP, etc atangin an ruat thin a. Kan kalphung tha tak ni thin kha MNF sawrkar hian a tichhe mek a ni," a ti.

Party a lungawilo tlankhawmte chu an dingchhuak ngai lo nia sawiin, "Mizoramah hian political party dang atanga lungawilo tlankhawmte hi inhlawmkhawmin, eng hming emaw inphuahin it-awm awm takin intarlang ve thin mah se, an dingchhuak tak tak ngai lo a. Hotu nih duh vang leh lansarh duh vanga pemkhawmte hi an pemkhawmna chhan bawk hian chhungril atangin a eichhe leh tho tho thin a. Chumi a chianna em em chu party mal anga MPC an kal hran hnu hian kum 2018 MLA inthlanpui zawha pawl kehdarh hmasa ber chu Zoram Peoples’ Movement (ZPM) hi a ni," a ti bawk.