Aizawl: Higher & Technical Education Minister Dr. R. Lalthangliana chuan nimin khan Govt. Hnahthial College tlawhin Govt. Hnahthial College a RUSA hnuaia building sak pathum leh Hnahthial District Skill Development Programme a hawng.

Heng hawnna puala inkhawm buatsaihah khuallian Dr. R. Lalthangliana, Higher & Technical Education Minister chuan, RUSA kaltlanga Govt. Hnahthial College in building thar tha tak tak an nei chu a lawmpui tih a sawi a, building tha neih chu thil lawmawm tak a nih rualin hlawhtlinna thlentu rahbi a nihna ang tur taka kan hman tangkai loh chuan a ho thlawn mai dawn a, Mzoram thalai lehkha-thiam ram leh hnam tana chhenfakawm tak tak chherchhuahna hmanraw tangkai tak ni ngei se a duh thu leh chutiang taka a tangkaina phawk chhuak thei tura an theihna zawng zawng hmang turin Govt. Hnahthial College-a zirtirtute a chah bawk a ni.

Minister chuan ziak leh chhiar thiam tamna state kan ni hi a hlut rualin hei hi kan ram hmasawnna leh hlawhtlinna tehfung, innghahna atan a hmantlak lo a ni tih kan hun tawngin a rawn hril chiang tawh a, thiamna chi hrang hrang tai darh zawnga inzirtirna kalpui a pawimawh takzet a, hemi atana pawimawh Skill Development hmanga Mizoram Youth Commission in hma an la hi a lawmawm a ni, a ti a. Lehkhathiamna mai piah bakah kan thalaite hnena thiamna bik Pathianin a dah hi haichhuak a, tihpun sak leh hlawhtlinna thlen tir tura theihtawp chhuah zel turin duhsakna a hlan bawk a ni.

Khualzahawm Dr. Vanlaltanpuia, MYC Chairman leh Higher & Technical Education Board Vice-Chairman pawhin thu sawiin, “Tunlai khawvelah zirna kalphung pangngai hian hna min pe vek seng tawh lo va, hna min pek theih pawh a tlem telh telh tawh avangin leh private enterprise an len telh telh avangin MYC chuan sawrkar hna piah lamah hna chi hrang hrang thawk thei tura Mizoram thalaite chherchhuah hi a ngai pawimawh em a, thiamna bik nei (skilled labour) chi hrang hrang mamawhna a nasat zual zel dawn avangin mahni kutke a eizawng thei tura Mizoram thalaite chherchhuah hi kan tum pawi-mawh ber a ni,” a ti.