Russia chuan tun hnaiah nasa takin Ukraine a bei leh a, khawpui hrang hrangah bomb a puak nasa hle. Russia leh Ukraine inkalpawhna lei pawimawh Crimean bridge tihchhiat a ni a, khawvela boxer ropui ber zinga mi Ukraine boxer Klitschko te unau hming chawia siam Klitschko Pedestrian-Bicycle Bridge pawh tihchhiah zingah hian a tel a ni. 

Klitschko Pedestrian-Bicycle Bridge hi kum 2019-a hawn chauh kha a ni a, khualzinte pawhin an tlawh nasa hle. He lei hmingthang tak hi tun hnai mai khan missile hmanga kahchhiat a ni a, video footage pawh hmuh tur a awm. Hei hian ram pahnih inkar boruak sosan zia a tilang a, US chuan Ukraine thlavang hauhin Russia chetdan a dem tak zet thu a sawi chhuak bawk.   
 
Inrinni khan Russia leh Ukraine thlunzawmtu Crimean-a Kerch Bridge-ah bomb nia hriat a puak a, lei hi a chhe nasa hle. Russia chuan he thil hi Ukraine tihah a puh a, hei vang hian Ukraine khawpui hrang hrang chu na takin a beizui a ni. Kerch Bridge hi km 19 zeta thui a ni a, Russia leh Ukraine inkalpawhna kawng pawimawh ber a ni. 

Russian President Vladimir Putin chuan Ukraine hi a puh chhe hle a, rawlrala che thinte chet dan ang maia cheah a puh. Hetih rual hian Ukraine chuan he thil hi Russia tih a nih thu a sawi ve thung a, ram pahnih inkar hian that lam a la pan lawk dawn lo tih a chiang hle.  

Lei hi lirthei eng emaw zat tlan laiin a chim a, a hnuai tuipuiah pawh lawng eng emaw zat hmuh tur a awm. Ralthuam phur truck-in lei hi a zawh a, a puak zui ta nia sawi a ni. Mahse hei hi expert te chuan thil ni thei loah an ngai a, a hnuaia lawng pakhat atanga puak thei thil hi chhuak niin an ngai. Video footage hrang hrang hmuh tur a awm a, mahse a bulpui ber hi hriat a la ni lo thung.