Ukraine chuan chhim lama Mariupol khawpuia civil mite tawm khawmna theatre chu an bomb niin a sawi.

Deputy Mayor Sergei Orlov chuan BBC hnenah he inah hian mi 1,000 atanga 1,200 velin himna zawng an biru niin a sawi.

Thi leh hliam zat hriat a ni lo va, tual chhung MP pakhat chuan chhuat zawl hnuai lei hnuaiah an tawm a, bomb hnan an nih thu a sawi.

“A lan dan maiah chuan a tam zawk chu an him niin a lang,” tiin Dmytro Gurin chuan BBC a hrilh.

Mayor adviser Petro Andriushchenko erawh chuan laipuia kah chhunzawm reng a nih avangin emergency worker-ten an la pawh thei lo niin a sawi ve thung.

Theatre thlalak thehdarah chuan a chhe hneh hle a, meikhu a chhuak chiai chiai bawk.

Russia-in thlawhna atanga a kah leh laipui a kah chuan naupang damdawi in, biak in leh apartment building te a lo fuh tawh bawk.

Mariupol-a city council chuan Russian sipaite hian theatre hi dim lo takin an bei niin thuchhuah an siamah an tar lang a, ‘Mariupol-a chengte tawmna in hi thlawhna hmangin bomb an thlak hnan’ niin a sawi.

Ukrainian Foreign Minister Dmytro Kuleba leh city council chuan Russia chet dan chu ‘war crime’ a tling tih an sawi.

Ukrainian President Volodymyr Zelensky pawhin bomb thlak hnan a nih ngei thu leh Russia hian theatre hi a tum ngei tih a sawi.

“Kan mite chunga Russia-in thiltih hi na kan ti,” tiin Nilaini zan rei tawh taka video message a tihchhuahah a sawi.

US company Maxar-in thlalem atanga thlalak a tihchhuahah chuan theatre kawtah hian Russian tawngin ‘naupang’ tih ziah a lang a, hei hi indona laka himna tura ziah a ni.

A hmain BBC pawhin naupang leh upa zawkte an tawm tih a lo tar lang tawh.

Tual chhung thuneitute chuan indona tan atangin Mariupol-ah hian mi 2,400 vel an thi tawh niin an sawi a, a tak takah erawh chuan hei aia tam a nih a rinawm a. Tam tak chu a ruala thihna thlenga thi an nih rin a ni.

Khawpuiah hian mi 3,00,000 vel la tangin tui, electric leh gas an nei mang tawh lo va. Chaw leh tui an tlachham hle tawh a, Russian sipaite hian puihna pek luh tur an dang vek rih a ni.

Theatre bomb a ni tih puan a nih hnu lawkah hian Russian defence ministry chuan thlawhna hmanga kah a ni tih chu a pha nghal tih RIA news agency chuan a tar lang.

Deputy Mayor Orlov chuan Nilaini khan car 1,500 velin Mariupol hi an chhuahsan leh tih a sawi a. Russia-in lirthei inzuite an beihnaah mi panga an hliam a, naupang a tel bawk niin a sawi.

International Committee of the Red Cross Chairman Peter Maurer chuan civil mite himna tur an mamawh pekna tur kawng hawng turin a ngen nawn leh a. Ni nga thanga Ukraine tlawha zin mek hian Mariupol dinhmun chu ‘mangchhia’ ang a nih thu a sawi.

Nilaini khan hmar lama Chernihiv khawpuia chhang lei tuma intlar mi 10 chu Russian laipuiin fuhin an thi bawk niin prosecutor general chuan a sawi a. Video thehdarh pakhat chuan khawlaiah ruang a let rum a ni.