DOWNLOAD OUR APP

Read latest news on your phone
app-store

Russia-Ukraine: Kyiv atanga inlak hran tumte che chhuak

Feb 20, 2022

Inlak hran tumte nen indo hnai : Ukraine hi Soviet republic hnuaia Russia nena awmho niin a kawm pawh an inkawmngeih hle a. Tun thleng hian Nato leh European Union member a ni lo va, tunah hian a hnaih mek. Russia pawhin Nato hi zawm lo a duh ber a ni a, a zawm a nih chuan a himna a derthawng pha dawn niin a ngai. Ukraine atanga inlak hran tuma bei pawlte chennaah hian mi maktaduai 3.5 vel an cheng nia hriat a ni a. Kum 2014 khan Ukraine-a Russian sorkarin a thlawp helho hi paih thlak an lo ni tawh a; mahse, tun thlengin an la bei chhunzawm reng a. Kha mi hnuah khan mi 7,20,000 vel zet chuan Russian khua leh tui nihna an nei zui tawh niin Russian chanchinbute chuan a tar lang. Indona chhuak leh mai thei tur anga ngaih a nih avangin Russia hnaiha inlak hran tumte awmnaa civil mi eng emaw zat chu hmun himah thiar chhuah an ni tawh a. Mi 6,500 vel zetin Donetsk an chhuahsan tawh.

Ukraine khawchhak lama Russia-in a thlawp inlak hran tuma bei pawlte chuan indanga ram din tumin an sipaite an chet chhuahtir.

Heng mi te hian People’s Republics of Donetsk & Luhansk din angin an inchhal tawh.

United States President Joe Biden chuan Russia chuan Ukraine a rûn ngei dawn niin a sawi a, Moscow erawh chuan a la pha zel.

Khawthlang ramte chuan Russia hian a lema thiltiin Ukraine rûn tum lo angin a awm a, a inbuatsaih reng niin an sawi bawk.

Ukraine khawchhak lam dinhmun thlithlaitute chuan inlak hran tum leh sorkar sipaite chu an inep nasa tial tial niin an sawi.

Inrinni tuk khan Ukrainian sipai pakhat chu laipuia kahna avangin a thi a. Ani hi tun hnaia boruak sang tak a inmun hnua thi hmasa ber a ni.

Biden-a Defence Secretary Lloyd Austin chuan Russian sipaite hian Ukraine ramri an hnaih hret hret zel niin a sawi.

Germany-a Munich-a security conference-a tel, US Vice-President Kamala Harris chuan Russia hian a thenawm hi a rûn a nih vaih chuan US leh a thawhpuite chuan ei bar lamah a hrek vak dawn a, an sum lam khawihna thil leh an industry pawimawhte an tum dawn niin a sawi.

UK Prime Minister Boris Johnson pawhin Russia hian a thal a thlah a nih chuan an ram chuan ‘Matryoshka dolls’ an tih hmangin Russian-te ta company-te chu London-a an intuak a khapsak dawn niin a sawi.

Johnson-a hi Munich-ah hian Ukrainian President Volodymyr Zelensky nen pawh an inkawm a. Zelenskhy-a hi President Biden chuan tel ve lo turin rawn mah se a kal lui a. An ram chhunga hun khirh tak a awm laia chhuak lo turin a ti bawk.

US hian Ukraine ramri-ah hian Russian sipai 1,69,000-1,90,000 vel an awm angin a sawi a. Heng zingah hian Donetsk leh Luhansk lak hran tuma bei pawl an tel bawk.

Russian President Vladimir Putin chuan Russia-in nuclear missile a neihte an enchhin vel chu Inrinni khan Moscow  atangin a thlir a, Ukraine khawchhak lama an boruak chu a ziaawm niin a sawi thung.

An buaina chu khawthlang ram hruaitute nen sawiho a inpeih reng tih a sawi a. An ram himna chungchang an ngaihtuahpui lo thung niin a sawi bawk.

Share now