Aizawl : Rangvamual kal leh a kaihhnawihte an khungkhawmna, Tuikual North Presbyterian Kohhran Hall-a mi 1 positive hmuhchhuah a nih avangin an veng chu an ralkhel hle a, YMA hruaitu pakhat leh mi dang 66 swap sample laksakte result a chhuah hnuah nimin khan contact tracing tih leh nghal a ni.

Zirtawpni zana positive hmuhchhuah hian a tirah chuan Rangvamual a kal ngai lo niin a insawi a; mahse, Pathianni khan a lo kal ngei tih hriat chhuah a ni. Amah hi bazar lama hnathawk thin niin Tuikual North YMA Secretary C.Lalthlamuana chuan ZALEN a hrilh a, a hnathawhna avanga hmun hrang hranga vak kual thin a nih avangin ngaihdan siam mai theih pawh niin a hriat loh thu a sawi.

“Hmun hrang hranga vak kual thin a ni a, khawi atanga kai nge a ni tih hi hriat mai a har hle. Ani aia Rangvamual kal nasate pawhin an kai chuang lo a, a kalpui ngei pawh a negative a ni. Chuvangin, 100% chuan Rangvamual atanga kai a nih kan ring lo,” a ti a, anniho buaipuitu a nih avang hian amah pawhin swap sample a laktir tih a sawi lang tel bawk.

Tuikual North lamin an veng an khungkhawm dan social media atanga a lan danin dem an hlawh hle a; mahse, hemi chungchangah hian C. Lalthlamuana chuan, “Kan veng Presbyterian Kohhran KTP-ten ruahmanna an siam vek a, feet 6 danah thutthleng indaidan vek an ni a; mahse, an lo inkal pawh leh vek a, an lo muho bawk a, an thuawih loh vang a ni,” tiin an dinhmun a sawi fiah. Positive an hmuh hi sawi tawh angin a vah kual hnem em avangin Tuikual North-ah hian nimin khan contact tracing neih nghal a ni.