Aizawl January 31, 2023: Vawiin khan General of The Salvation Army  General Brian Peddle chuan Booth Mansion Hall, Salvation Army Eastern India Territory Headquarter, Temple Square-ah Chanchinthar lakhawmtute a kawm a, he hunah hian Salvation Army te Mizoram People Forum-a an tel loh chhan zawh a ni a, Politics kaihhnawihah an inrawlh lutuk thin loh thu in a chhang.

Salvation Army hotulu ber General Brian Peddle chuan tuna India Eastern Territory a rawn tlawh mek chu India ramchhunga territory a tlawh pathumna a nih thu leh India Salvation Army hnathawh hrang hrang a hmuh avangin lawm thu a sawi. 

The Salvation Army-in Mizoram People Forum (MPF) an zawm dawn leh dawn loh zawhna chhangin, he pawl hi a hriat mai loh thu leh politics thilah khawvel huap ang chuan Salvation Army te an inrawlh lutuk loh thin thu a sawi a, hetihlai hian ralmuanna a thlen theihna atana an tih theih a awm a nih chuan tha an thawh ve theih a beisei thu a sawi. Hemi chungchang hi India Eastern Territory hotu ber, Territorial Commander Colonel Lalhmingliana chuan tun dinhmunah MPF zawm tumna a awm rih loh thu leh an inrawnkual mek thu a sawi thung a ni. 

Neih inang kawp thin, LGBTQIA+ (Lesbian, Gay, Bisexual, Transgender, Rueer / questioning, Intersex, Asexual+) chungchanga Salvation Army tanna chungchanga zawhna chhangin General Brian Peddle chuan, "Bible-in a sawi anga inneihna chu mipa leh hmeichhe inkara kalpui tur a nih thu leh chu chu an pawm dan a ni," a ti. Hetah hian neih inang inkawp thin te chu an ensan tihna a nih loh thu leh an mimal zalennaa an zah sak thu a sawi a. An tan pawh hna an thawh thu leh tumah thliar loa Pathian hmangaihna mi ten an hriat chu an rawngbawlna pawimawh ber a nih thu a sawi a ni.

Salvation Army-ah mipa leh hmeichhia an intluktlan viau thu General Brian Peddle chuan a sawi a. Hmeichhia te pawh hruaitu atana an ‘ordain’ thin thu leh hmeichhia te pawhin tuna a dinhmun chelh mek, General hna pawh an chelh theih thu a sawi bawk.  

General Brian Peddle te nupa lo zin hian an inkhawmpui lian, India Eastern Territorial Congress, naktuk atanga February 5 thlenga neih tur chu an hmanpui dawn a. Hei bakah hian Biak In thar pathum - Phunchawng Corp, Hunthar Corp leh Vaivakawn Corp te a hawng dawn bawk. General te nupa hian February 6, 2023 hian Mizoram an chhuahsan ang.