ZALEN, Sept., 18, 2024: Mizoram Baptist Kohhran leh Champhai Grape Grower Society (CGGS) chuan kum hnih chhung atan Lalpa Zanriah buatsaihnaa hman tur sacramental wine chungchangah inremna thuthlung an ziak thar leh.

Thawhtanni tlaia Champhai Winery, Tlangsama inremna thuthlung ziah tharna inkhawmah hian BCM aiawhin General Secretary Rev. Dr. R. Lalbiakliana, Rev. Vanlalnghaka Jongte leh Upa Biakchungnunga, Office Superinendent ten hming ziakin CGGS atangin an chairman, HS Vanlalfakzuala leh General Secretary C. Zohmingliana ten an ziak a. K. Zonunsanga, DHO, Champhai distrirt-in a ziak bawk.

Inremnaah hian ‘sacramental wine bottle khat, 750ml, Rs. 150 man chu excise duty, road tranport leh permit te BCM hian a buaipui ang a; a quality, bottle, colour, acidity, taste leh a rim te chu inremna ziaktute pahnih remtihna lovin tihdanglam theih a ni lo vang’ tih tar lan a ni.

Kohhran dangin an hmang ve duh chuan a hmang duh hian general secretary, BCM hnenah emaw, general manager, CGGS hnenah emaw an thlen ang a, an pahnih remtihnain an hmang thei dawn a ni tih tar lan a ni bawk.

BCM leh CGGS hian kohhran serh leh sang pawimawh tak, Lalpa Zanriah buatsaihna, sacramental wine siam chhuah chungchangah November 11, 2016 khan inremna an lo siam tawh a, heta tang hian CGGS siam chhuah zel hi sacramental wine atan an hmang tawh a ni.