Aizawl; October ni 23, 2020-a Saihapui ‘V’ huam chhunga mi, Bengali Medium tia sawi thin, Dholakhal LP School (Bengali school) bomb hmanga tihchhiat chu Mizoram sawrkar hmalaknaa education department-in a sak that hnuah kumin academic session thar atang khan Saihapui V Primary School atan hman a ni a, kum rei tak Mizoram chhunga hnam dang sikul lo awm tawh, Dholakhal LP School erawh kalpui chhunzawm a ni tawh lo.

Saihapui V atanga ZALEN thudawn danin, Dholakhal LP School chu Mizoram sawrkarin chei tha a, luah theiha peih fel a nih hnuah Saihapui V-a Mizoram sawrkar sikul awmsa, Saihapui V Primary School chuan thutthlengte dah lutin, an sikul building nen an kartawn thin a, mumal zawkin kumin academic session thar, April atang khan an luah lut.

Dholakhal LP School tia hriat thin hi bomb hmanga tihchhiat a nih hnuah zirlai naupangte leh zirtirtuten an tiltiaksan a, Saihapui V-a leilet enkawltu hnam dangte pawhin Saihapui V Primary School-ah an fate an luhtir deuh vek tawh nia thudawn niin, Assam lam pawhin engmah rawn sawi buai an nei ngai lo nia thudawn a ni.

Saihapui V Primary School-ah hian zirlai 46 an awm mek a, Mizoram sawrkarin SSA teacher pahnih leh special trainer pahnih dahin, zirtirtu pali an awm mek a, Mid Day Meal pawh tha takin an dawng a, hnam dang zirlai naupangte pawhin Mizo naupangte zir ang an zir ve mai zel niin Saihapui V atanga ZALEN thudawnna chuan a sawi.

Dholakhal LP School hi Saihapui ‘V’ piaha cheng hnam dang naupangte luhna thin niin, zirtirtute pawh hnam dang vek an ni thin a, sikul building chhe ta chu kum 2010-a Assam sawrkarin a sak a ni.