June 26, 2023; Serchhip district chhung Sailulak khuaa an Sial vulh te tunhnaiah Chinghnia in a seh thin a 10 chuang sehhlum tawhin hliam pawh an awm nual nia thudawn a ni.

ZALEN thudawn danin, Sailulak khua hian chhungkaw 46 in Sial vulhin, 300 vel an vulh mek nia hriat a ni a, December - March inkar hi a no neih hun vanglai niin, chung hun chho ah chuan Chinghnia hian an Sial vulh hi an rawn bei thin a, kumin a a sehhlum tawh an hriat chian, a ruang an hmuh hi 10 vel a tling a, a ruang an hmuh loh te nen 10 aia a tam rin a ni.

Kum 2020 hmalam chuan a sehtu an awm lo a, an Sial vulh pawh an pung chak a, 2020 atangin Chinghnia an nei tan a, kumtin a rawn seh sak thin a, chu chu tun a an harsatna lian tak tawh a ni. Tunhnai ah Sial ruang 10 vel an hmu tawh a, a ruang hmuh loh pawh a la awm nual an ring. Se no chauh ni lo pawh Chinghnia te hian an seh tho a, an seh tam ber erawh a tuai aia nau, la chak vak lo te an ni tlangpui.

An harsatna tawh hi Forest department ah an report a, hun kal tawhah zangnadawmna te a remchan ang angin pek an lo ni tawh. An Sial sehtu Chinghnia vengin Sial neitute an thawkchhuak thin a, tunlaiin Sailulak Sial vulhtute an buai hle nia thudawn a ni. Sial bei thintu Chinghnia te hi 7 bawr vel an tling nia hriat a ni.