Aizawl May 22, 2023 : Saipum Br.YMA chuan 20/05/2023 (Inrinni) khan Damlona avanga hna thawk chhunzawm thei lo, mi harsa leh tanpui ngai te chu hnatlang-in Buh tin hnih an tuh zawh sak a, Buh an tuh zawh hian hlo thlawh sakin, Feh haw pahin an thingtuah tur Nula leh Tlangval ten Thing an phurh haw sak nghal bawk.

Saipum YMA ten an tanpui te hi unau mipa pahnih leh hmeichhia 4 an ni a, an unau hi mi pangai phah chiah lo deuh vek niin Saipum atanga kan thudawnna chuan a sawi a, an nu leh pa ten an thisan tawh a, tun dinhmunah an eizawngtu ber hian u mipa pakhat leh hmeichhia pahnih a enkawl a, a upa lam hi hnathawk thei tawh lo an ni. 

An unaua hmeichia pakhat zawk hi inchhung sekrek khawitu leh enkawltu ber a ni a, Stroke avangin dt.15/05/2023 khan a eirawngbawl lai a tlu a, Durtlang Hospital panpui nghal a ni a, May 20, 2023 (Inrinni), Sapum YMA ten an Buh an tuh sak ni tlai dar 6:30pm khan a boral zui a ni. 

YMA-in Buh an tuh sak leh hlo an thawlsak te chhung hi pianphung ah rual ban chiah lo an ni hlawm a. Tuna chhungkaw chawmtu ber hi thalai a nih lai chuan Mitthi lumenpui ngai an awma hmaih ngai lo, damlo tlaivar pui ngai an awma tel lo ngai lo niin thudawnna chuan a sawi a, Khawhar In riak taima leh YMA thiltih nikhua a taima leh inpe zo tak niin a sawi bawk.