ZALEN February 27, 2025 : ZPM Thalai Hqrs. President MLA Jeje Lalpekhua leh Thalai Media & Publicity Dept-te chuan vawiin khan Sairang-a Sawhthing dahkhawmna in an tlawh a, hemi kaihhnawiha an thuchhuakah Kut hnathawktute Sawhthing chu sawrkarin a leisak vek dawn tih an tarlang.

ZPM Thalai thuchhuak chuan Mizoram sawrkar chuan Sawhthing chingtute hnen atangin Sawhthing quital 14,000 vel lei tawhin Kg khat ah Rs. 50 in a lei a, cheng Nuai 700 man chuang a lei tawh a ni. Mizorama kut hnathawktute thar Sawhthing hi sawrkar chuan a leisak vek dawn a, Loneitute'n an thawh hah phu tawk hlawkna an hmuh hi Mipui sawrkar tum ber a ni. Mizoram Sawrkar chuan Argriculture Dept. hnuaiah Sawhthing sawngbawlna tur a ruahman mek bawk a, Sawngbawlna lam titu turte nen pawh Agreement buaipui mek a ni a, Mizoram Sawrkar Policy Bana kaih ( Handholding Policy) hmanga enkawl zui anni dawn a ni, an ti.

ZPM Thalai chuan tun dinhmunah Kuthnathawktute Sawhthing lei nan sawrkar chuan Rs.150 /- Crore a dah sa tawh a, Mizoram chhunga Kuthnathawktute Sawhthing hralhna kawngah lo chiai lo turin ZPM Thalai chuan a chah a, khaw thenkhatah 'Sawrkar-in a lei dawn lo' tia man tlawm zawka Sawthing leitu ten Mizoram sawrkar hnenah Commission chhawn leh an tum mek a, heng mite lakah hian mipuite lo inveng turin ZPM thalaite chuan an chah bawk. Tuna Sairang FCI Godown-a Sawhthing dahkhawm te hi a zavaia leitu tur Mizoram Agriculture Marketing Board chuan a hmu tawh a, February 28, 2025 (Friday) atangin sawrkar chuan a hralh chhuak tan dawn an ti.

"Chief Minister Pu Lalduhoma hi kum 30 chuang ngawt Kut hnathawktute tan a lo au tawh a. Thlai thar lei Policy kum tamtak lo vahvaihpui tawhtu a nih zia kan kut hnathawktute pawh hian hria sela, lo thlaphang lo turin ZPM Thalai chuan kan chah duh a ni. "Kan ti ang" a tih chu, ti thin mi Chief Minister huaisen Pu Lalduhoma kan nei hi ZPM Thalai chuan kan chhuang tak zet a ni," an ti bawk.