Aizawl: Sairang Dinthar khawtlang chuan an khaw ram chhungah sipai dah tumna a awm nia sawiin he thil hi a tawp thlenga dodal an tum niin an sawi.

Nimin khan Aizawl Press Club-ah chanchinbumite kawmin Sairang VCP Sangkunga chuan an khaw ram chhunga sipai dah tumna chu Sairang VC leh tlawmngai pawl hrang hrangte chuan an duh lo tih a sawi a. Sipai dah an duh loh chhan sawiin tuna sipai dah an tumna chu acre 570 a zau a ni tiin chhungkaw tam tak ei zawnna hmun a ni a, sipai dah an nih chuan an ei zawnnain a tuar dawn niin a sawi a. Hei bakah an awmna tura ruahman hnuai mai, Durlui chhuah chu balu lakna kai leh Aizawl leh hmun dang atanga mi tam takin intihhlimna atan an hman a ni a, sipai an awm chuan civil leh sipai inkarah buaina a chhuak fo ang tih an hlau niin a sawi a. Sipai tana ram lak tur an ruahman chu Tlawng riverine forest huam chhung a ni tiin mi mal ram neih sawrkarin a phal loh laia ram zau tak mai sipai tana pek chu sawrkar dan bawhchhiatna ah an ngai tih a sawi bawk a.

Aizawla sipai batallion khat awm pawh mipuiin hnawk an ti tih sawiin sawn chhuah tum reng laia sipai batallion eng emaw zat dah chu harsatna a thleng thei dawn nia sawiin khawtlangin an duh lo chungchung chu hmala zui lo turin sawrkar an ngen tih a sawi bawk.

Sairang Dinthar NGO hruaitute chuan an khaw huam chhung Kolabari hmunah kum 2013 atangin India sipai hmunpui dah tumna a awm tawh niin an sawi a, mahse khawtlang mipuiin an duh loh avangin chawlhsan leh a ni tih an sawi a. Kum 7 zet a liam hnuah December 2020 tawp lam khan District Collector, Aizawl district hnenah NOC dil thar an awm leh a, he thil hi an dem tak zet tih sawiin an khawtlangin an ngenna te ngai pawimawh lova NOC hi pekluih anih chuan an zualko theihna hmun hmunah zualko vein a tul angin Court-ah PIL thehluh an tum niin an sawi bawk.