Aizawl May 30, 2023 : Vawiin khan Aizawl West - I bialtu MLA Zothantluanga (Valtea), Vice Chairman, Man Power Development Board chuan a bial chhunga mi Sairang khawtlang hnenah tui chhung luhna thuam, Scuba/ Diving equipment set hnih a hlan.

Valtea chuan, "Kan sawrkar leh VC-te nena kan hmalakna a zarah hetiang hmanraw changkang leh tha, man to tak mai kan nei thei ta hi Aizawl mipui mai bakah Zoram mipui tan chanchin lawmawm tak a ni. Sairang khawtlang tan erawh In tlawmngaih chhuahna kawnga hmanraw tha zawk kan inpek a ni mai a. Heng hmanrua tangkaipui tur tak zawk chu Zoram mipuite kan ni. Zoram hmun hrang hranga tuitla ruang zawn ngai an awmin Mizo tak leh tlawmngai takin in thawk chhuak thin a, In tlawmngaihna te hi a chhuanawm tak zet a ni. In tlawmngaihna leh in inpekna tha tichak tura hmanrua kan in pe thei hi lawmawm ka ti hle," a ti.

He hunah hian Sairang khawtlang hruaitu kalkhawm te chu DC leh Governor te pawn an lo dil thin, pawimawh leh tul min tihpui viau chunga a taka hlawhtlinna an hmuh ngai loh an hmu ta, tih an sawi. "Kan bialtu MLA Pu Valtea'n kan mamawh leh kan harsa kan thlen apiang mai min tihsak thei zel mai hi vannnei kan inti a, hetiang a khawtlang min hmangaih puitu MLA kan nei hi kan lawm tak zet zet a ni," an ti.

Aizawl West-I MLA hian Sairang khawtlang te football field tha a laihsak chu a tlawh nghal a. "Field puitling tha an nei vat dawn a ni," a ti. Bial chhunga Class - X leh Class - XII top ten a lang te lawmpuina Laptop a hlan bawk a ni.