June 19, 2022; Sairang Tlawng lui chim chin sang zelin harsatna nasa zawk a thlen lohna turin Sairang khawtlang chuan hmalakna an kalpui mek a, vawiin (June 19, 2022) tlai dar 3 thleng khan chhiatna nasa zawk a thlen hlauhthawn thuah chhungkaw 2 an inthiarchhuak tawh.

Sairang Branch YMA hruaitute hnen atanga ZALEN thudawn danin, Tlawng lui chim chin chu tun dinhmunah darkar 1 a feet 1 ang vel zelin a san belh mek a, ruahmanna siam lawk hleihtheih a awm loh rualin, tui chim chin san ang zelin hmalakna an kalpui mek a ni. 

Ruahmanna an siam danah chuan, inthiarchhuah ngai an awm a, chhungte bel duh an nih chuan an bel ang a, chumi a nih loh chuan YMA hall, sobji bazar leh shelter home sak mekte chu luahluh theih turin an buatsaih fel tawh.

Sairang Branch YMA hnuai a disaster manangement sub committee ten thil awmdan an thlithlai reng a, Sairang Branch YMA leh Sairang VC te hmalakna in, bungraw thiarchhuah ngai an awm thulh ah lirthei pawh chhawpsa rengin dah a ni tawh bawk. Sairang Branch YMA hruaitute chuan, tui chim chin an ngaihchan reng thu te, a tul dan ang zel a inthiarchhuak zel tur a an inruahman thu te an sawi.