Aizawl: Chakma (Takam) mi thenkhatin Saizawh West a Mizo tlangval Kross Hmingthanga an khawih chung-changah nimin khan Saizawh West NGO leh Young Chakma Association (YCA) te chuan Chawngte 'C' MZP Pisa ah meeting an nei. Young Chakma Association in Mizo mipuite hnenah ngaihdam an dil.

Nimin chawhma dar 9 a meeting ah hian MZP General Headquarters President B. Vanlaltana chuan, Saizawh khuaa cheng Zohnahthlak awm mek te chu Mizote tan ral hmatawng leh kan ram neih chhun zimte venghimtu an ni tiin Takam misualte laka zamlo a, huaisen taka lo dolet zel turin leh an thlavang hauh tura Mizo thalaite tam tak an awm thu a hrilh. Saizawh NGO hruaitute chuan Takam hoin development ah nasa taka an thlim dan leh hamthatna an pek that ve duh loh thu leh Takam ten Chakma Autonomous District Council (CADC) area hnuaia Mizo awmte an hmusit dan leh kut an thlak fo thu te an sawi a. Mizoram sawrkar pawhin CADC area chhunga Mizo khuate chu ngaihven tur leh CADC hotute hnenah pawh hmalak pui tura an duh thu MZP hruaitute an hrilh.

Chawhnu dar 1:00 khan MZP Sub-Headquarters, Pisa Chawngte ah Young Chakma Association (YCA) hotu zawng zawng kohkhawm an ni a. He hunah hian B. Vanlaltana chuan, Mizo ten Mizoram chhunga hnam dang te hi kut an thlak ngawt ngaihloh thu leh an diriam ngawt ngai loh thu a sawi a. Hnamdang Takam, Tuikuk leh Vai te zawk hian a ram neitute zawk kutthlak a, thisen chhuah mai duh tawk loin nunna hial an laksak thin niin a sawi a. September 3, 2020 tlailama thil thlengah pawh Takam misual 50 chuang zetin Mizo tlangval chu a chenna inah kal chilhin an sawisa a. He thil hi MZP chuan a a hrethiam ngai dawn lo a, a dem takzet thu a sawi nawn leh a. A tul angin sorkar laipui thlenga thlen anih tur thu a sawi bawk.

Central Young Chakma Association (CYCA) President Dr. Joyti Chakma chuan he thil thleng hi pawi an tih thu leh Mizo mipui leh kut tuar chhungte chungah ngaihdam a dil a. Pawi khawihtu mante hi hrem ngei an duh thu leh MZP te duh anga Mizo mipuite hnenah ngaihdam dilna an tih chhuah tur thu a sawi bawk.

MZP hruaitute chuan tlai dar 3:00 khan Chief Executive Member, CADC Rasik Mohan Chakma chu a chenna inah hmu nghalin, pawikhawihna thleng avanga Mizo tlangvalin Takam kut a tuar chu MZP ten an hrethiam thei dawn lo a, CEM anihna anga mawhphur ngam tur leh hliamtuar pawh CADC in zangnadawmna pe nghal turin MZP chuan an hriattir a. CEM chuan MZP te ngenna angin CADC chuan hliam tuar hnenah Rs. 50,000/- an pek tur thu MZP hruaitute a hrilh.

MZP chuan Chawngte ah hian Takam pawn chhuah a khap angin dawr leh office pawh khar vek a ni.