Synod Relief Fund April - June, 2014 inkar Synod Relief Fund hetiang hian sem a ni : Damlo rethei 30 hnenah Rs.1,56,000; Accident-a thi mi 4 hnenah Rs.58,000; Accident-a hliam mi 12 hnenah Rs.63,000; Kangmei tuar mi 24 hnenah Rs.3,06,000; Thlipui tuar mi 23 hnenah Rs.2,08,000; Mirethei zual mi 6 hnenah Rs.45,000; Rualbanlo mi 5 hnenah Rs.25,000 leh pa eisual vaga thi mi 1 hnenah Rs.20,000/- nen a vaiin mi 105 hnenah Rs.8,81,000/- semchhuah a ni. Thianghlimna Trainers Training Aizawl; UPCNEI-Aizawl East District hnuaia Thianghlimna Committee te buatsaihin July ni 8 khan Aizawl East District Conference Hall-ah Thianghlimna Trainers Training an nei a. Mizoram State Tobacco Control Society lam atangin Dr. Jane Ralte, Nodal Officer te, R Lalremruata, Project Co-Ordinator leh ISTH ten an hmanpui. Health Minister Lal Thanzara chu khuallian niin, thupui hrang hrang - Vaihlo leh a kaihhnawih chungchang a hriattur pawimawh te, Vaihlo khuahkhirhna Dan (COTPA) chungchangte, Kristianna leh Zuk leh hmuam chungchang te leh Vaihlo bansan duhte tana hriattur pawimawhte zirho a ni. He hunah hian Aizawl khawpui chhunga Bial hrang hranga aiawh leh District Department hruaitute leh sawm bik mi 100 chuang an kalkhawm a ni. LIKBK 'Hnuchham Pathianni' Aizawl; Vawiin hi LIKBK Hnuchham Pathianni a ni a, thupui atan hian ‘Nang malsawmna ni ang che’ (Gen. 12:2) tih hman a ni. Kum danga tih dan lo deuhin kumin Hnuchham Pathian ni hian LMH Board Member te Lawngtlai town chhung tualchhung kohhran thenkhat te tlawh tura programme siam a ni Lairam Isua Krista Baptist Kohhran hian Hnuchham In pakhat a enkawl mek a, chu chu LAIRAM MOTHERLESS HOME (LMH) tih a ni. Home-ah hian nausen pianghlim atanga kum nga (5) inkar enkawl thin an ni a, tunah hian naupang mipa 5 leh hmeichhia 5 an awm mek a, he home atang hian naupang 84 an chhuak tawh a, naupang thi 12 an awm tawh bawk. Lairam Motherless Home hian; Kohhran, mimal, tlawmngai pawl leh mi thahnemngai tak tak te hnen atangin thilpek chi hrang hrang tam tak an dawng thin a, kum 2013-2014 chhung khan a sum faiin Rs. 2,08,640 dawn a ni. Lairam Motherless Home (LMH) hnuaiah hian sawrkar hriatpuina leh phalna in Adoption Center (Fa-lak theihna) kalpui a ni bawk a, chu chu Lairam Child Adoption Center (LCAC) tih a ni. Naupang admit 8 awm tawhin naupang lak adopt 4 an awm a, tunah 3 awmin fa la duh nghak mek 3 an awm bawk. Synod-in School titha lawmman sem Mizoram Synod chuan July ni 11 khan Synod Committee Room No.II-ah Presbyterian English School, HSLC result 2014-a ti thate chawimawina hun hmangin lawmman a sem. Presbyterian English School din hi Synod 1993 Gen.44-na thuchhuak anga tih a ni a, School hmasa ber chu kum 1995 khan Zarkawt leh Serchhip-ah din tan a ni. School hawn phalna petu chu Synod Executive Committee a ni a, tun thleng hian permission a pek tawh chu 102 niin la pek hmabak 8 an la awm bawk. Kum 2014-a HSLC exam result chhuakah khan school 12 atangin exam beitu an awm a. Chung zinga school 7 chuan 100% passed record an nei thei a, school 4 chuan 90% chin chung lam passed record an nei a, school 1 chu 70% chung lam a ni. Kum 2013 khan HSLC exam beitu hi school 7 an awm a, an vaiin 100% passed record an nei vek a ni. Kumin 2014-a zirlai HSLC exam beitu zat chu 230 a ni a, an zinga 222 an passed a, Distinction-ah 11, First division-ah 61, second division-ah 103, third division-ah 46 niin a pum puia khaikhawmin pass percentage chu 96.6 a ni a, letter mark hmu thei zirlai 41 an awm. HSLC exam lo awm leh turah chuan school 17-in an hmachhawn thei tawh dawn a ni. Kum 2014 lawmman dawngtute hi pakhatna PES, Serchhip hnenah Desktop Computer, pahnih PES, Ramthar Veng hnenah Rs.12,000/- leh pathumna PES, Saitual hnenah Rs.10,000/-; PES 5 - Khawzawl Vengthar, Khawzawl, Kawlkulh, Keifang leh Nongmynsong hnenah Consolation Prize Rs.5000/- theuh pek an ni bawk. Heng bakah hian Marie Lalhruaikimi d/o Lalnunchama, Saitual; Lianthangpuii d/o Vanlalzika, Serchhip leh Lalruatpuii d/o Zorampela, Champhai Zotlang te hnenah hnenah Laptop Computer pek an ni bawk.