Aizawl : Mission Venga dawr nei, August 8, 2020-a doctor positive tih hriat chhuahin a tlawh dawr, Focus Photo Express nghaktu, Salem Venga mi fate pahnih, kum 12 leh kum 14 mi chu an positive tih hmuhchhuah a ni a, dawr nghaktu nupa erawh an negative thung a. Nimin khan anni nupa hi test nawn leh an ni a, an result hi a negative leh tak avangin Mission Veng Local Task Force chuan an veng chhung lockdown a hlip hrih a. Hetih lai hian hriat theih chinah Aizawl khaw chhung veng 4 - Salem Veng, Venghnuai, Lily Veng leh ITI Vengten lockdown an puang mek bawk a ni.

Hripui kai naupangte hian thian an lo kawm nual a, an inkhelhpuite pawh nimin khan an sample laksak niin an pahnih hian ZMC lamah dah luh nghal an nih thu Salem Veng Local Task Force Secretary K. Lalrinmawia chuan ZALEN a hrilh.

Mission Veng TF chuan an venga dawr nghakte chhungkua RT-PCR test negative tawh hnuah Rapid Antigen Test leh Rapid Antibody Test-a an negative leh tho avang hian lockdown an puan chu nimin tlai dar 5 atang khan an hlip a. Focus dawr nghaktu fate hi an dawrah hian an rawn kal ngai lo tih an sawi avangin inkharkhip hi tulah hre tawh loin an hlip ta tih an sawi.

Chutihrualin Mission Veng huam chhunga dawrkai zawng zawngin anmahni dawrtu hming, phone number leh veng chhinchhiahna register bu neiin chhinchhiah vek tawh turin an hriattir a, ngaihchan ngai nia ngaih dawr tlem te chu la inhawng lo tura tih an ni bawk.

Mission Veng LTF thuchhuahin a sawi danin Focus Photo Express, Mission Veng Bazar-a mi nghaktu hi doctor-in a tlawh ni (08.08.2020) a report a nih veleh quarantine tura hrilh nghal niin ani hian hemi ni chawhma lama thil print tura dawrtu (customer) tumah a neih loh thu a sawi avangin fimkhur thilah helai vela xerox dawr dang 2-te chu chhui tel nghal a ni a.

Doctor-in xerox dawr a tlawh hun lai vela dawrtu nei zawk, Kima Xerox Centre dawr chu a kalna nia ngaiin doctor kal lohna dawr chu chhui a ni ta zawk a ni.

Nizan dar 8:30 atang khan Venghnuai pawhin Magistrate hriatpuinain an veng huam chhungah Total Lockdown an puang a, an veng thenawm Salem-a Covid-19 positive contact tracing felfai taka kalpui a nih theih nan Total Lockdown hi puang an nih thu, an thuchhuahah chuan an tar lang. IDSP lamin remchang hmasa berah swab sample an laksak ang.

Hetih lai hian ITI Veng chuan an veng pa Salem Veng-a positive pahnih awmna chhungkua hi a tlawh avangin, nimin tlai dar 5:00 atanga khan lockdown an puang a, veng chhungah inchhui a awlsam nana ti an ni tih ZALEN thudawnna chuan a sawi.

Lily Veng pawh nimin thleng khan lockdown an la ni a, anni vengah hian positive 10 hriat theih chinah hmuh tawh an ni a, nimin lam khan mi engemaw zat chu an sample lak sak leh an ni a, nizan lamah khan an result hi chhuak hman tura ngaih a ni.

Nimin vek khan Ramhlun North chuan an veng huamchhung, Basic Mual Mawng Area chu an lockdown a, an lockdown chhan hi helai bawra mi thenkhat leh Darlawn lama positive an hmuhchhuah nen inzawmna an neih vang a ni a, swab sample test turin hma an la mek.

Ti hian hriat theih chinah, Salem Veng, Venghnuai, Lily Veng leh ITI Veng te chu Lockdown an ni a, Ramhlun North hian an veng area tlem an lockdown ve bawk. Aizawl pawn lamah Darlawn tlangdung khua engemaw zat lockdown an ni a, Sakawrdai lama positive nena inzawmna nei khua te an ni.