Aizawl : Covid-19 hri leng mek vei leh vei loh test a nih hmaa an khak an lak (swab sample test) te an result chhuah hmaa mipui zinga an lo chhuak thin te hremna dan a awm lo mumal tih, Health & Family Welfare Department chuan ZALEN an hrilh a, dan siam leh hunah chuan tel a nih tur thu an sawi a, chutihrual chuan hripui chuan vantlang a la luhchilhlo nia an ngaih thu an sawi.

Swab sample lak tawh result nghah laia mi zinga lo chhuak vak awmin hmun thenkhata buaina a thlen chung chang sawiin, "Swab sample lak tawh, result la chhuah hmaa lo chhuak te hremna dan chiah hi kan lo nei lo a. Mahni chhia leh tha hriatna hmang mai tura kan lo ngai a, mahse, a lo ni chiah lo a ni. Swab sample lak tam zawk te hi chu quarantine centre-a awm an lo ni zel bawk a, dan siam leh hunah telh a ngai a ni," tiin Dr. Pachuau Lalmalsawma chuan ZALEN a hrilh a.

Tunhnaia hotel pakhat hnathawk pahnih te chungchang pawh chhui chhunzawm zel a ni tih Dr Pachuau chuan a sawi a, mi pahnih te an kai hma khan test ni tawhin an negative niin a sawi a. Swab sample hi laksak leh niin, anmahni rinhlelh vang lam ai mahin an thawhna Hotel hi quarantine centre a nih vanga lak sak an nih thu ZALEN a hrilh a, an lo positive ta si a ni. An hnathawhna avanga kai theih na chhan tam tak an neih thu leh RT-PCR chuan za a za a hmuh loh avangin false negative awm thei a nih thu a sawi bawk. An chhui tawh chinah leh hotel a thleng te result atangin community transmission a la awm lovah a ngai thung.

Frontline worker tak tak te chu an swab sample test sak reng ni mah se, an hnathawh avangin chhuah chang an neih thin thu a sawi.