ZALEN July 31, 2025; TT Zothansanga, Mizoram Pradesh Congress Committee (MPCC) Legal department chairman chuan congress leh MNF hun laiin, Samthang zikhlum chingtuten a tihralna kawngah harsatna an tawk ngai lo niin a sawi.

Vawiin chhun dar 12 khan Aizawl press club-ah thuthar thehdarhtute kawmin, TT Zothansanga, EX MLA chuan, Samthang zikhlum neitute an mangang tawh hle tih sawiin, an hralh theih loh avanga tam tak tawihral te a awm bakah, a then chu vawk chaw atan bag khat Rs. 300 a hralh te, tihngaihna hriat loh avanga leitha atana satsawm te an awm niin an sawi.

Aizawl veng hrang hrangah YMA ten an lo zawrhpui thu te, quintals 350 zet an lo tihral sak thute sawi bawkin, "YMA te kai chhana sawm tul khawpa kan lo neitute manganna ang hi Mizoramah a la awm ngai lo," a ti bawk.

TT Zothansanga sawi danin, Samthangah In 145 in zikhlum an ching a, Khankawnah In 111, East Tuipui bial khaw hrang hrangah In 400 chuangin zikhlum hi innghah nan an hmanga, an vaiin zikhlum tiak nuai 30 vel an phun a, thar chhuah an beisei zat chu quintals 10,000 chuang zet a ni.

Tuna kan sawrkar hrawn mek hi thlai thar buaipui chungchanga beiseina sang tak nena Zoram mipuiin kan thlan an nih thu sawiin, TT Zothansanga chuan, "Thlai thar hralh chungchangah hian tun ang harsatna hi kan tawk ang tih tuman an ring ngai lo," a ti a. Leina tur D-A-H a ri ring hle a, an han sawrkar a, a thlangtu mipuite an hawisan chiang hle niin a sawi. "Congress leh MNF kan sawrkar laiin hetiang taka harsatna nasa hi kan la tawka ngai lo, a chhan chu tihtakzeta mipuite hmakhua kan ngaihtuah thin vang a ni," a ti bawk.

#ZalenNews